Япония ҳукумати император Акихитонинг тахтдан тушганидан сўнг «дайдзё тэнно» ёки қисқача «дзёко» мақомини олиши учун ҳаракат қилмоқда. Бу мақомни шартли равишда «оромдаги император» деб таржима қилиш мумкин. Бу ҳақда ишончли манбаларга асосланиб Kyodo ахборот агентлиги хабар қилган, деб ёзади «ТАСС».
«Дзёко» мақоми императорларнинг тахтдан тушиши тез-тез содир бўлган феодализм даврида кенг қўлланилган. Ҳозирда ушбу атаманинг 83 ёшли император Акихитонинг тахтдан кетиши билан боғлиқ бўлган барча жараёнлар ва шарт-шароитларни тартибга солишга қаратилган махсус қонунга киритилиши мўлжалланмоқда. У фақат ҳозирги императорга нисбатан қўлланилади.
«Дзёко» мақомининг ишлатилиши бир қатор экспертларнинг хавотирига сабаб бўлмоқда. Ўрта асрлардаги тартибларга асосан, тахтдан тушаётган император маълум сиёсий ҳокимиятни ўзида сақлаб қолган. Япония ҳукумати бу ҳодисани қатъий четлаб ўтишни хоҳламоқда ва бу янги қонунда ҳам ўз аксини топиши керак.
Акихито 2016 йил август ойининг бошида ўзининг телемурожаати орқали кекса ёшдалиги сабабли тахтдан кетмоқчи эканлигини билдирган эди. Ижтимоий сўровларнинг натижаларига кўра, унинг мақсадини Япония аҳолисининг катта қисми қўллаб-қувватламоқда. Ҳозирги вақтда вазирлар маҳкамаси қошида ҳозирги қонунчиликда кўзда тутилмаган императорнинг олдинда турган тахтдан кетишининг барча жиҳатларини ўрганиб чиқувчи экспертлар кенгаши ишламоқда. ОАВлар 56 ёшли валиаҳд шаҳзода Нарухитонинг отаси тахтдан кетганидан сўнг тахтга ўтириши амалда ҳал бўлган, деб ҳисобламоқда. Янги император 2019 йил 1 январда тахтга ўтириши кутилмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)