Xonanda Lola Instagram’dagi sahifasida hayotining qaysidir bir olti yilidagi o‘ziga ma’qul bo‘lmagan jihatlarni yodga olgani holda, orzu qilish va hayotni o‘zgartirish haqidagi shaxsiy mushohadalari bilan o‘rtoqlashdi.
Orzu haqida gaplashamizmi? Xoynahoy, sizda ham orzu bo‘lsa kerak? Orzu har kimda bor. Orzuingiz haqida tez-tez o‘ylab turasizmi? Unga haqiqatan ham butun qalbingiz bilan ishonasizmi? Men aniq bilaman – orzular ro‘yobga chiqadi! Bu qandaydir balandparvoz gaplar emas, bu – siz bilan o‘rtoqlashmoqchi bo‘layotgan shaxsiy tajribam.Instagram’dagi mazkur posti ostida Lola o‘z muxlislari bilan muloqotga kirishgan: unga minnatdorchilik bildirganlarga javoban rahmat aytgan, savol bilan murojaat qilgan foydalanuvchilarga shaxsiy tajribasidan kelib chiqib hayotiy maslahatlar bergan.Bir necha yil avval, shahardan 35 kilometr uzoqlikda yasharkanman, 6 yil davomida sevimli ishim bilan shug‘ullanish, o‘qish, sayohat qilish, do‘stlarim bilan muloqot qilish, istaklarimga ergashish imkoniyatlaridan mahrum holda, bir kun kelib bu haqda gapirishimni xayolimga ham keltira olmasdim. Biroq bugun men sizga o‘shanda o‘zim muhtoj bo‘lgan so‘zlarni aytishni istayman.
Siz o‘zingiz yashab turgan borliq ijodkorisiz. Hech kim qalbingiz amriga qarshi chiqa olmaydi. Agar hozir siz yashab turgan borliq zavq va quvonch bag‘ishlamayotgan bo‘lsa, unga minnatdorchilik bildiring va uni o‘zgartiring! Har qanday ijod mahsuli fikrdan boshlanadi. Fikrni o‘zgartiring, boshqa so‘zni ayting, qandaydir yangilikka qo‘l uring va buni ishonch bilan, a’lo darajada amalga oshiring!
Yangi, o‘zingizni baxtiyor his qiladigan borliqni yarating! Bu sizga uqtirib, ishonishga majbur qilishganidek emas, balki siz o‘zingizni rostmana baxtli his qiladigan borliq bo‘lsin. O‘zingizga savol bering: kim bo‘lishni xohlaysiz? Nima qilmoqchisiz? Nimaga ega bo‘lmoqchisiz? Har turli shubha-gumonlardan qutuling, o‘zingizdagi pessimizni yo‘qqa chiqaring va qo‘rquvlarni yengib o‘ting! Ha, aytishga oson, lekin urinib ko‘rmas ekansiz, Everestni zabt etish ham bajarib bo‘lmas vazifadek ko‘rinadi. Biroq imkoni yo‘q narsaning o‘zi yo‘q.
Agar siz o‘zingizni ilojsiz, juda og‘ir ahvolda his qilsangiz, hech qanday yaxshilik kutib bo‘lmaydigan va hech narsani o‘zgartirib bo‘lmaydigandek tuyulsa... hammasini boshidan o‘ylab ko‘ring! Kimligingizni avvalo o‘zingizga eslating va harakatga kirishing! Men uddaladim, siz ham uddalaysiz!
Lola, xonanda
Ma’lumot uchun, xonanda Lola 2005-yili turmushga chiqqan, 2011-yili ajrashgan. Turmushidan Shahina ismli qizi va Shohdiyor ismli o‘g‘li bor. 2016-yil 16-yanvarida uning sobiq turmush o‘rtog‘i Shohrux navbatdagi marta oila qurgani ma’lum bo‘lgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)