«Мен уддаладим, сиз ҳам уддалайсиз!». Хонанда Лола ҳаётидаги «қора олти йиллик»ни қандай енгиб ўтгани ҳақида сўзлаб берди

Хонанда Лола Instagram’даги саҳифасида ҳаётининг қайсидир бир олти йилидаги ўзига маъқул бўлмаган жиҳатларни ёдга олгани ҳолда, орзу қилиш ва ҳаётни ўзгартириш ҳақидаги шахсий мушоҳадалари билан ўртоқлашди.

Орзу ҳақида гаплашамизми? Хойнаҳой, сизда ҳам орзу бўлса керак? Орзу ҳар кимда бор. Орзуингиз ҳақида тез-тез ўйлаб турасизми? Унга ҳақиқатан ҳам бутун қалбингиз билан ишонасизми? Мен аниқ биламан – орзулар рўёбга чиқади! Бу қандайдир баландпарвоз гаплар эмас, бу – сиз билан ўртоқлашмоқчи бўлаётган шахсий тажрибам.

Бир неча йил аввал, шаҳардан 35 километр узоқликда яшарканман, 6 йил давомида севимли ишим билан шуғулланиш, ўқиш, саёҳат қилиш, дўстларим билан мулоқот қилиш, истакларимга эргашиш имкониятларидан маҳрум ҳолда, бир кун келиб бу ҳақда гапиришимни хаёлимга ҳам келтира олмасдим. Бироқ бугун мен сизга ўшанда ўзим муҳтож бўлган сўзларни айтишни истайман.

Сиз ўзингиз яшаб турган борлиқ ижодкорисиз. Ҳеч ким қалбингиз амрига қарши чиқа олмайди. Агар ҳозир сиз яшаб турган борлиқ завқ ва қувонч бағишламаётган бўлса, унга миннатдорчилик билдиринг ва уни ўзгартиринг! Ҳар қандай ижод маҳсули фикрдан бошланади. Фикрни ўзгартиринг, бошқа сўзни айтинг, қандайдир янгиликка қўл уринг ва буни ишонч билан, аъло даражада амалга оширинг!

Янги, ўзингизни бахтиёр ҳис қиладиган борлиқни яратинг! Бу сизга уқтириб, ишонишга мажбур қилишганидек эмас, балки сиз ўзингизни ростмана бахтли ҳис қиладиган борлиқ бўлсин. Ўзингизга савол беринг: ким бўлишни хоҳлайсиз? Нима қилмоқчисиз? Нимага эга бўлмоқчисиз? Ҳар турли шубҳа-гумонлардан қутулинг, ўзингиздаги пессимизни йўққа чиқаринг ва қўрқувларни енгиб ўтинг! Ҳа, айтишга осон, лекин уриниб кўрмас экансиз, Эверестни забт этиш ҳам бажариб бўлмас вазифадек кўринади. Бироқ имкони йўқ нарсанинг ўзи йўқ.

Агар сиз ўзингизни иложсиз, жуда оғир аҳволда ҳис қилсангиз, ҳеч қандай яхшилик кутиб бўлмайдиган ва ҳеч нарсани ўзгартириб бўлмайдигандек туюлса... ҳаммасини бошидан ўйлаб кўринг! Кимлигингизни аввало ўзингизга эслатинг ва ҳаракатга киришинг! Мен уддаладим, сиз ҳам уддалайсиз!

Лола, хонанда

Маълумот учун, хонанда Лола 2005 йили турмушга чиққан, 2011 йили ажрашган. Турмушидан Шаҳина исмли қизи ва Шоҳдиёр исмли ўғли бор. 2016 йил 16 январида унинг собиқ турмуш ўртоғи Шоҳрух навбатдаги марта оила қургани маълум бўлган эди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.