Putin rossiyalik harbiy xizmatchilarga qisqa muddatli shartnomalar tuzishga imkon beruvchi qonunni imzoladi

Rossiya prezidenti Vladimir Putin harbiy xizmatchilarga qisqa muddatli shartnomalar tuzishga imkon beruvchi qonunni imzoladi. Bu haqda “RBK” xabar bermoqda.

Oldinlari askar, matros, serjant va starshinalar birinchi shartnomani 2 yoki 3 yilga, praporshik, michman yoki zobitlar esa 5 yilga tuzishi mumkin edi. Yangi qonunga ko‘ra, mazkur toifadagi harbiy xizmatchilar ma’lum bir sharoitlarda bir yilgacha (eng kam muddat ko‘rsatilmagan) bo‘lgan shartnomani imzolash huquqiga ega bo‘ladi.

Qisqa muddatli shartnoma favqulodda holatlar yoki tinchlik va xavfsizlikni ta’minlash davomida tuzilishi mumkin.

Shuningdek, bir yilgacha bo‘lgan shartnoma “Rossiyadan tashqarida xalqaro terrorchilik faoliyatiga chek qo‘yish” va kemalarning safarga yo‘l olishi vaqtida imzolanishi ko‘zda tutilgan.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.