Babayan adashdi: Odil Ahmedov Xitoyning “Shanxay SIPG” klubi bilan shartnoma imzoladi

O‘zbekiston milliy terma jamoasi sardori, Rossiyaning “Krasnodar” klubi yarim himoyachisi Odil Ahmedov faoliyatini Xitoyning “Shanxay SIPG” klubida davom ettiradi. Bu haqda “Krasnodar” rasmiy sayti ma’lumot berdi.

Avvalroq Odil Ahmedovga “Shandong Luneng” qiziqayotgani haqida xabar chiqqan bo‘lib, Xitoy klubi “Krasnodar” uchun 8 million yevro berishga tayyorligi ma’lum qilingandi. Keyinroq esa “Shanxay SIPG” varianti paydo bo‘ldi. O‘zbekiston milliy terma jamoasi bosh murabbiyi Samvel Babayan esa Odil Ahmedov “Krasnodar”da qolishini ma’lum qilgandi. Biroq uning aytgani noto‘g‘ri bo‘lib chiqdi.

• Odil Ahmedovni sotgan klublar hech qachon zarar ko‘rmagan. Futbolchining barcha transferlari — bitta suratda

2014-yilning iyun oyida safimizga kelib qo‘shilgan Odil Ahmedov 101 ta rasmiy o‘yinda maydonga tushib, 7 ta gol urishga muvaffaq bo‘ldi va 13 ta golli uzatma berdi. Muxlislarimiz uni har bir o‘yinda borini berib harakat qilgani uchun ham yaxshi ko‘rardi. Biz Ahmedovning Xitoydagi faoliyatiga omad tilab qolamiz.

“Krasnodar” futbol klubi

Odil Ahmedov “Oriat Dono” radiosi bilan suhbat davomida Germaniya Bundesligasida to‘p surishni istashi haqida aytib, Fransiya, Germaniya va Ispaniya klublaridan unga takliflar bo‘lganini ta’kidlagan edi. 29 yoshli futbolchining Xitoyga yo‘l olishida Prosportmanagment kompaniyasi muhim rol o‘ynadi. “Krasnodar” transfer yuzasidan bergan o‘z bayonotida mazkur kompaniyaga alohida minnatdorchilik bildirgan.

Qayd etish kerak, mazkur kompaniya bilan O‘zbekiston milliy terma jamoasining yana bir a’zosi — Eldor Shomurodov ham hamkorlik qiladi.

Ma’lumot uchun, Xitoyning “Shanxay SIPG” klubini o‘z vaqtida Sankt-Peterburgning “Zenit” klubida ishlagan portugaliyalik Andre Villash-Boash boshqarib boradi. Mutaxassis Rossiyadagi faoliyati orqali Odil Ahmedovning imkoniyatlarini biladi, deyish mumkin.

Xitoy klubi 2016-yilgi mavsum davomida Osiyo klublari uchun rekord summaga ikki futbolchi xarid qilishga ulgurgan edi. Avvaliga “Zenit”dan Xalk, keyinroq esa “Chelsi”dan Oskar “Shanxay SIPG” bilan shartnoma imzolagan.

Odil Ahmedovdan tashqari Xitoy Super Ligasida O‘zbekiston milliy terma jamoasining yana ikki nafar futbolchisi to‘p tepadi. Anzur Ismoilov “Chanchung Yatai” futbol klubi sharafini himoya qilsa, Yegor Krimets “Beytszing Goan” safida harakat qiladi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.