Ўзбекистон миллий терма жамоаси сардори, Россиянинг «Краснодар» клуби ярим ҳимоячиси Одил Аҳмедов фаолиятини Хитойнинг «Шанхай SIPG» клубида давом эттиради. Бу ҳақда «Краснодар» расмий сайти маълумот берди.
Аввалроқ Одил Аҳмедовга «Шандонг Луненг» қизиқаётгани ҳақида хабар чиққан бўлиб, Хитой клуби «Краснодар» учун 8 миллион евро беришга тайёрлиги маълум қилинганди. Кейинроқ эса «Шанхай SIPG» варианти пайдо бўлди. Ўзбекистон миллий терма жамоаси бош мураббийи Самвел Бабаян эса Одил Аҳмедов «Краснодар»да қолишини маълум қилганди. Бироқ унинг айтгани нотўғри бўлиб чиқди.
2014 йилнинг июнь ойида сафимизга келиб қўшилган Одил Аҳмедов 101 та расмий ўйинда майдонга тушиб, 7 та гол уришга муваффақ бўлди ва 13 та голли узатма берди. Мухлисларимиз уни ҳар бир ўйинда борини бериб ҳаракат қилгани учун ҳам яхши кўрарди. Биз Аҳмедовнинг Хитойдаги фаолиятига омад тилаб қоламиз.Одил Аҳмедов «Краснодар»га қадар Махачқалъанинг «Анжи» клуби сафида тўп сурган. «Анжи» эса уни Тошкентнинг «Пахтакор»идан сотиб олган. «Шанхай SIPG» футболчи фаолиятидаги тўртинчи профессионал клуб бўлди. «Sports.ru» маълумотига кўра, хитойликлар Аҳмедов учун «Краснодар» ҳисоб рақамига 7 миллион евро ўтказиб берган.«Краснодар» футбол клуби
Одил Аҳмедов «Ориат Доно» радиоси билан суҳбат давомида Германия Бундеслигасида тўп суришни исташи ҳақида айтиб, Франция, Германия ва Испания клубларидан унга таклифлар бўлганини таъкидлаган эди. 29 ёшли футболчининг Хитойга йўл олишида Prosportmanagment компанияси муҳим рол ўйнади. «Краснодар» трансфер юзасидан берган ўз баёнотида мазкур компанияга алоҳида миннатдорчилик билдирган.
Қайд этиш керак, мазкур компания билан Ўзбекистон миллий терма жамоасининг яна бир аъзоси — Элдор Шомуродов ҳам ҳамкорлик қилади.
Маълумот учун, Хитойнинг «Шанхай SIPG» клубини ўз вақтида Санкт-Петербургнинг «Зенит» клубида ишлаган португалиялик Андре Виллаш-Боаш бошқариб боради. Мутахассис Россиядаги фаолияти орқали Одил Аҳмедовнинг имкониятларини билади, дейиш мумкин.
Хитой клуби 2016 йилги мавсум давомида Осиё клублари учун рекорд суммага икки футболчи харид қилишга улгурган эди. Аввалига «Зенит»дан Халк, кейинроқ эса «Челси»дан Оскар «Шанхай SIPG» билан шартнома имзолаган.
Одил Аҳмедовдан ташқари Хитой Супер Лигасида Ўзбекистон миллий терма жамоасининг яна икки нафар футболчиси тўп тепади. Анзур Исмоилов «Чанчунг Ятаи» футбол клуби шарафини ҳимоя қилса, Егор Кримец «Бейцзинг Гоан» сафида ҳаракат қилади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)