O‘zbekistonlik bokschi Hasanboy Do‘stmatov yilning eng yaxshi bokschisiga atalgan Xalqaro havaskor bokschilar assotsiatsiyasi (AIBA) sovrinini qabul qilib olish uchun 18-dekabr kuni Shveysariyaga jo‘nab ketdi. Bu haqda “Olamsport” xabar bermoqda.
Avvalroq AIBA tomonidan yilning eng yaxshi bokschisini aniqlash maqsadida o‘tkazilgan xalqaro so‘rovnomada Hasanboy Do‘stmatov eng yaqin ta’qibchisi — qozog‘istonlik Olimpiada chempioni Daniyar Yeliusinovni katta farq bilan ortda qoldirgani holda, birinchi bo‘lgan edi.
Xabar berishlaricha, taqdirlash marosimi 20-dekabr kuni Shveysariyaning Lozanna shahrida bo‘lib o‘tadi. Tadbirda Do‘stmatovga O‘zbekiston boks federatsiyasi vitse-prezidenti, Osiyo boks konfederatsiyasi vitse-prezidentiga aylangan Sherzod Toshmatov hamrohlik qiladi.
23 yoshli Hasanboy Do‘stmatov 2016-yili Braziliyaning Rio-de-Janeyro shahrida bo‘lib o‘tgan yozgi Olimpiada o‘yinlari boks musobaqalarida 49 kilogramm vazn toifasida chempionlikni qo‘lga kiritdi.
Rio—2016 dagi yorqin ishtiroki sabab, Hasanboy Do‘stmatov 1936-yildan beri har Olimpiadada texnikasi eng kuchli bokschiga topshiriladigan Vel Barker kubogini qo‘lga kiritgan ilk o‘zbekistonlik bo‘ldi.
Bundan tashqari, dekabr oyida Hasanboy Do‘stmatov sportda yuqori natijalarni qo‘lga kiritgan sportchilarga topshiriladigan xalqaro “Oltin mangust” mukofoti bilan taqdirlangani ma’lum qilingan edi.
Olimpiadadagi ishtirokidan so‘ng Hasanboy Do‘stmatov O‘zbekiston Birinchi Prezidenti Islom Karimov tomonidan “O‘zbekiston iftixori” faxriy unvoni, 200 ming dollar miqdoridagi pul mukofoti hamda Malibu avtomobili bilan taqdirlangan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)