OAV: Odil Ahmedov braziliyalik Xalk va Oskar o‘ynaydigan Xitoy klubi bilan shartnoma tuzib bo‘lgan

Futbol bo‘yicha O‘zbekiston milliy terma jamoasi sardori Odil Ahmedov Xitoyning “Shanxay SIPG” klubi bilan shartnoma imzolab bo‘lgan. Bu haqda, Xitoydagi manbalarga asoslanib, “Sports.uz” xabar bermoqda.

Avvalroq Odil Ahmedov Xitoyning “Shanxay SIPG” klubi qiziqishlari doirasiga kirgani haqida xabar berilgandi. Futbolchining o‘zi 28-dekabr kuni “Oriat Dono” radiosiga bergan intervyusida “Xitoy klubining taklifini oila davrasida muhokama qilib, keyin yakuniy qarorga kelishini” ta’kidlagan edi.

• Bundesligada to‘p surish orzusidagi Odil Ahmedov Ispaniya, Germaniya va Fransiya klublaridan takliflar borligi haqida aytdi

“Xitoy futboliga eng yaqin bo‘lgan jurnalist Shiao Liangji ‘Shanxay SIPG’ klubi Odil Ahmedov bilan shartnoma imzolaganini tasdiqlamoqda. Klub va futbolchi tomonidan hali rasmiy xabar berilmadi. Lekin Xitoydagi futbolga oid ommaviy axborot vositalarining eng ishonchli manbasiga aylanib ulgurgan mazkur jurnalist shu vaqtgacha noto‘g‘ri ma’lumot tarqatmagan”, — deb Xitoydagi manbasining so‘zlaridan iqtibos keltirmoqda “Sports.uz”.

“Shanxay SIPG”dan oldinroq Ahmedov bilan Xitoyning boshqa bir klubi “Shandong Luneng” qiziqayotgan bo‘lib, u “Krasnodar” hisob-raqamiga 8 million yevro o‘tkazib berishi kutilayotgandi.

• Rossiya chempionatiga o‘tgach, Odil Ahmedovning transfer narxi 6 barobar oshgani ma’lum qilindi

“Shanxay SIPG” 2016-yilgi mavsumda Osiyo futbol klublari uchun rekord bo‘lgan summaga Xalk va Oskarni sotib olgandi. Xalkning orqasidan “Zenit” 55,8 million yevroishlab olgan bo‘lsa, Oskarni olib kelish uchun xitoyliklar 70,5 million chiqim qilgandi.

Ma’lumot uchun, “Shanxay SIPG” klubini portugaliyalik mutaxassis Andre Villash-Boash boshqaradi. Uning qo‘li ostida Xalk va Oskardan tashqari yana bir braziliyalik Elkesen, shuningdek, argentinalik Dario Konka, ivuarlik Jan Evrard Kuassi, Janubiy Koreyadan Kim Ju Yung bor.

Xitoy Super Ligasida legioner futbolchilar cheklovi bor bo‘lib, 5 nafar xorijlik futbolchi bilan shartnoma tuzish mumkin. Shularning hech bo‘lmaganda 1 nafari albatta osiyolik bo‘lishi kerak.

Qayd etish kerak, Andre Villash-Boash Odil Ahmedov harakat qiladigan Rossiya Premyer-Ligasida ishlab, “Zenit” klubiga ustozlik qilgandi. Bu esa mutaxassis Ahmedovning imkoniyatlarini bilishini bildiradi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.