ОАВ: Одил Аҳмедов бразилиялик Халк ва Оскар ўйнайдиган Хитой клуби билан шартнома тузиб бўлган

Футбол бўйича Ўзбекистон миллий терма жамоаси сардори Одил Аҳмедов Хитойнинг «Шанхай SIPG» клуби билан шартнома имзолаб бўлган. Бу ҳақда, Хитойдаги манбаларга асосланиб, «Sports.uz» хабар бермоқда.

Аввалроқ Одил Аҳмедов Хитойнинг «Шанхай SIPG» клуби қизиқишлари доирасига киргани ҳақида хабар берилганди. Футболчининг ўзи 28 декабрь куни «Ориат Доно» радиосига берган интервьюсида «Хитой клубининг таклифини оила даврасида муҳокама қилиб, кейин якуний қарорга келишини» таъкидлаган эди.

• Бундеслигада тўп суриш орзусидаги Одил Аҳмедов Испания, Германия ва Франция клубларидан таклифлар борлиги ҳақида айтди

«Хитой футболига энг яқин бўлган журналист Шиао Лиангжи ‘Шанхай SIPG’ клуби Одил Аҳмедов билан шартнома имзолаганини тасдиқламоқда. Клуб ва футболчи томонидан ҳали расмий хабар берилмади. Лекин Хитойдаги футболга оид оммавий ахборот воситаларининг энг ишончли манбасига айланиб улгурган мазкур журналист шу вақтгача нотўғри маълумот тарқатмаган», — деб Хитойдаги манбасининг сўзларидан иқтибос келтирмоқда «Sports.uz».

«Шанхай SIPG»дан олдинроқ Аҳмедов билан Хитойнинг бошқа бир клуби «Шандонг Луненг» қизиқаётган бўлиб, у «Краснодар» ҳисоб-рақамига 8 миллион евро ўтказиб бериши кутилаётганди.

• Россия чемпионатига ўтгач, Одил Аҳмедовнинг трансфер нархи 6 баробар ошгани маълум қилинди

«Шанхай SIPG» 2016 йилги мавсумда Осиё футбол клублари учун рекорд бўлган суммага Халк ва Оскарни сотиб олганди. Халкнинг орқасидан «Зенит» 55,8 миллион евроишлаб олган бўлса, Оскарни олиб келиш учун хитойликлар 70,5 миллион чиқим қилганди.

Маълумот учун, «Шанхай SIPG» клубини португалиялик мутахассис Андре Виллаш-Боаш бошқаради. Унинг қўли остида Халк ва Оскардан ташқари яна бир бразилиялик Элкесен, шунингдек, аргентиналик Дарио Конка, ивуарлик Жан Эврард Куасси, Жанубий Кореядан Ким Жу Юнг бор.

Хитой Супер Лигасида легионер футболчилар чеклови бор бўлиб, 5 нафар хорижлик футболчи билан шартнома тузиш мумкин. Шуларнинг ҳеч бўлмаганда 1 нафари албатта осиёлик бўлиши керак.

Қайд этиш керак, Андре Виллаш-Боаш Одил Аҳмедов ҳаракат қиладиган Россия Премьер-Лигасида ишлаб, «Зенит» клубига устозлик қилганди. Бу эса мутахассис Аҳмедовнинг имкониятларини билишини билдиради.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.