Rossiyalik og‘ir vaznli bokschi Aleksandr Povetkinning doping ishi bo‘yicha tekshiruvlar 2017-yil boshida yakuniga yetishi kutilmoqda. Bu haqda Jahon boks kengashi (WBC) prezidenti Maurisio Sulaymon ma’lum qildi, deya xabar bermoqda “Sport-Ekspress”.
“Biz tekshiruv boshladik. Yangi yilgacha juda kam vaqt qoldi, shu sababli dam olish kunlari ham ko‘p bo‘ladi. Biz tekshiruvni 2017-yil boshida yakuniga yetkazamiz”, — dedi Sulaymon.
Eslatib o‘tamiz, 17-dekabr kuni, Povetkinning kanadalik Bermeyn Stivernga qarshi jangiga bir soat qolganida, rossiyalik bokschining namunalaridan taqiqlangan modda — ostarin topilgani ma’lum bo‘ldi.
Shu sababli, Povetkinning kanadalik bokschiga qarshi WBC muvaqqat chempioni unvoni uchun o‘tkazilishi lozim bo‘lgan jangi bekor qilindi; shu kuni Povetkin Stivern o‘rniga fransiyalik Yoann Dyuopga qarshi ringga chiqdi.
Yekaterinburgda bo‘lib o‘tgan jangda Aleksandr Povetkin fransiyalik raqibini oltinchi raundda nokaut bilan mag‘lub etdi. Jang norasmiy maqomda o‘tdi. “R-Sport”ning yozishicha, fransiyalik bokschi ringga yugurish krossovkalarida chiqqan.
Promouter Andrey Ryabinskiy 17-dekabr kuni ma’lum qilganidek, Dyuop “zaxira varianti” edi. “Bunday yirik tadbirlarda har doim zaxira varianti bo‘ladi”, — deya tushuntirgan edi u.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)