Rossiya mudofaa vazirligining Tu-154 samolyoti halokatga uchrashi natijasida qurbon bo‘lgan 92 kishidan biri — Aleksandrov nomli ashula va raqs akademik ansambli rahbari Valeriy Xalilov haqida o‘tgan yili Rossiyaning “Kultura” telekanali maxsus ko‘rsatuv tayyorlagan edi.
“Hayot chizig‘i” (“Liniya jizni”) ko‘rsatuvida Rossiya armiyasi bosh dirijori, bastakor, Rossiya Bastakorlar ittifoqi a’zosi, general-leytenant Valeriy Xalilov nimaga aynan harbiy dirijor bo‘lgani, yaqinlaridan uzoqda bo‘lish qanchalik qiyinligi, dastlab harbiy-musiqa maktabi, keyinroq konservatoriyaning harbiy-dirijorlik fakultetidagi o‘qishi, harbiy intizomga to‘liq rioya qilish va haqiqiy harbiy bo‘lish haqida gapirib bergan edi.
“Xalilovga ajoyib karyera yaratish va nomi butun dunyoga mashhur bo‘lgan rostakam musiqachi bo‘lib yetishishda uning oilasidagi an’analar, iste’dodi va xarakteri yordam berdi”, — deyiladi dasturda.
Termiz shahrida 1952-yilda tug‘ilgan dirijor va bastakor, general-leytenant, Rossiya xalq artisti Valeriy Xalilov shu yil aprelida ansambl badiiy rahbari etib tayinlangandi. U “Spass minorasi” xalqaro harbiy-musiqiy festivali rahbari edi.
Izoh (0)