Arktikaning Aksel-Xeyberg orolida olimlar 90 million yil avval yashab o‘tgan va o‘tkir tishlari bo‘lgan qushning toshga aylangan qoldiqlarini topdi, deya xabar bermoqda National Geographic.
Tishli qushlar olimlarga XIX asrning oxiridan buyon ma’lum. Ayni paytgacha qushlarning ushbu qirilib ketgan sinfiga taalluqli 100 dan ortiq nusxa topilgan. Ularga tegishli ko‘plab xususiyatlar bahsli hisoblanadi; olimlarda yagona fikr yo‘q.
Topilmani Rochester universiteti geologlari aniqladi. Toshqotgan qoldiqlar tahlili ushbu qush yashab o‘tgan davrni ancha aniq belgilash imkonini berdi: bu bo‘r davrining turon yarusi (taxminan 93,9—89,8 million yil oldin). O‘shanda Arktika muz bilan qoplanmagan, aksincha u yerda vulqon faolligi bo‘lgan, iqlimi hozirgi Floridadan ko‘p ham farq qilmagan, toshbaqa va timsohlar esa faunaning odatiy vakillari bo‘lgan.
Topilmaga Tingmiatornis arctica deb nom berishdi. Uning tashqi qiyofasini qayta tiklab, olimlar uni katta chayka yoki baklanga qiyoslamoqda.
Izoh (0)