Bugun, 25-dekabr kuni Sochi shahri yaqinida Rossiya mudofaa vazirligining Tu-154 samolyoti quladi. Uning bortida 92 kishi — san’atkorlar, OAV vakillari va harbiy xizmatchilar bo‘lib, ular Rossiya havo-kosmik kuchlarining Hmeymimdagi aviabazasiga yo‘l olgan edi.
Mazkur fojia munosabati bilan “TASS” agentligi 2000-yildan buyon kuzatilgan Tu-154 samolyotlarining qulashi bilan bog‘liq o‘nta voqeani esga oldi.
2001-yilning 4-iyulida “Vladivostok Avia” kompaniyasining Tu-154M yo‘lovchi samolyoti (bort raqami — RA-85845) Yekaterinburg–Irkutsk–Vladivostok yo‘nalishi bo‘yicha DD 352 reysini amalga oshirayotganida Irkutsk aeroportiga qo‘nishga urinish paytida halokatga uchradi. Bortda bo‘lgan 145 kishi — 136 yo‘lovchi va to‘qqiz nafar ekipaj a’zosi halok bo‘ldi. Halokat sababi — ekipajda o‘zaro hamkorlikning buzilishi bois boshqaruvning izdan chiqishi.
2001-yil 4-oktabrida “Sibir” (bugungi S7 Airlines brendi) aviakompaniyasining Tu-154M (bort raqami — RA-85693) yo‘lovchi samolyoti 1812 Tel-Aviv–Novosibirsk reysini amalga oshirish chog‘ida Qora dengiz ustida, Sochidan 200 kilometr janubi-g‘arbda halokatga uchradi. Bortda bo‘lgan 78 kishi — 66 nafar yo‘lovchi va 12 ekipaj a’zolari halok bo‘ldi. Xalqaro aviatsiya qo‘mitasi taftishi natijalariga ko‘ra, samolyotga Ukrainaning S-200 zenit-raketa kompleksining harbiy mashg‘ulotlar chog‘ida uchirilgan raketasi tegib ketgan. Ukraina fojia uchun yuridik javobgarlikni rasman tan olgan emas.
2002-yil 12-fevralida Eronning Xurramobod shahri aeroportidan 20 kilometr narida Iran Airtour aviakompaniyasining IRB956 reysini amalga oshirayotgan Tu-154M (bort raqami — EP-MBS) samolyoti halokatga uchradi. Tehrondan kelayotgan samolyot murakkab ob-havo sharoitida 2773 kilometr balandlikda Ko‘hi Safid tog‘iga urildi. Bortda bo‘lgan 119 kishi — 107 nafar yo‘lovchi va 12 nafar ekipaj a’zosi halok bo‘ldi.
2002-yil 1-iyulida Boden ko‘li ustida (Yuberlingen shahri, Germaniya) aviadispetcherning xatosi tufayli “Bashkirskiye avialinii” kompaniyasining (Rossiya) VTS 2937 Moskva–Barselona reysini amalga oshirayotgan Tu-154M (bort raqami — RA-85816) yo‘lovchi samolyoti Germaniyaning DHL kompaniyasiga tegishli, Bahrayndan Bryusselga DHX 611 yuk reysini amalga oshirayotgan Boeing 757-23APF (bort raqami — A9C-DHL) transport samolyoti bilan to‘qnashib ketdi. Samolyotlar bortida bo‘lgan barcha odam — 71 kishi, shu jumladan, DHL’ning ikki uchuvchisi va Rossiya samolyotidagi 69 kishi (ularning 52 nafari — Ispaniyaga dam olishga ketayotgan bolalar) halok bo‘ldi. 2004-yil 24-fevralida to‘qnashgan samolyotlarni yo‘naltirgan aviadispetcher Piter Nilsen halokatda rafiqasi va ikki bolasidan ayrilgan me’mor Vitaliy Kaloyev tomonidan o‘ldirildi.
2006-yil 22-avgustida “Pulkovo” aviakompaniyasining 612 Anapa–Sankt-Peterburg reysini amalga oshirayotgan Tu-154M (bort raqami — RA-85185) yo‘lovchi samolyoti Suxaya Balka qishlog‘i (Donetsk viloyati, Ukraina) yaqinida quladi. 160 yo‘lovchi va o‘n nafar ekipaj a’zosi halok bo‘ldi.
2006-yil 1-sentabrda Iran Airtour aviakompaniyasining Tu-154M (bort raqami — EM-MCF) yo‘lovchi samolyoti Eronning Mashhad shahri aeroportida qattiq qo‘nishni amalga oshirdi. Bandar-Abbosdan kelayotgan samolyot yerga tekkanda old shassidagi nuqson tufayli samolyot uchish-qo‘nish tasmasidan tashqariga chiqib ketib, olov oldi. Bortda bo‘lgan 148 kishidan (137 yo‘lovchi va 11 nafar ekipaj a’zosi) 28 nafari halok bo‘ldi.
2009-yilning 15-iyul kuni Eronning Caspian Airlines aviakompaniyasiga tegishli Tu-154M (bort raqami — EP-CPG) yo‘lovchi samolyoti 7908 Tehron–Yerevan reysi bo‘ylab parvoz qilayotganida Qazvin shahri yaqinidagi Jannatobod qishlog‘ida quladi. Dispetcherlar ma’lumotiga qaraganda, samolyot balandlikka ko‘tarilishni to‘xtatib, 270 darajaga aylangan va 1,5 daqiqa davomida qulagan. Bortda bo‘lgan 168 kishi — 15 nafar ekipaj a’zosi va 153 yo‘lovchi halok bo‘ldi. Qurbonlarning besh nafari Armaniston fuqarolari, qolganlar esa eronliklar edi.
2010-yil 10-aprelida Polsha harbiy-havo kuchlarining Tu-154M samolyoti “Smolensk–Severniy” aerodromiga (Rossiya) qo‘nish chog‘ida halokatga uchradi. Samolyot bortida Polsha prezidenti Lex Kachinskiy hamda Polsha siyosiy va harbiy rahbariyati vakillari bor edi. Ular Katin qurbonlari xotirasiga bag‘ishlab tashkil etilgan motam marosimiga kelayotgan edi. 89 yo‘lovchi va yetti nafar ekipaj a’zosidan hech kim omon qolmadi.
2010-yil 4-dekabrda “Dagestanskiye avialinii” kompaniyasiga tegishli, YuX372 Moskva–Maxachqal’a reysini amalga oshirayotgan Tu-154M (bort raqami — RA-85744) yo‘lovchi samolyoti Moskvaning “Domodedovo” aeroporti uchish-qo‘nish tasmasidan chiqib ketdi. Bortda bo‘lgan 171 kishidan (163 yo‘lovchi va sakkiz nafar ekipaj a’zosi) ikki nafari halok bo‘ldi.
2011-yil 1-yanvarida Rossiyaning Kolavia aviakompaniyasiga tegishli, 348 Surgut–Moskva reysi bo‘yicha uchayotgan Tu-154B-2 (bort raqami — RA-85588) yo‘lovchi samolyoti Surgut aeroportida yerdan yurish paytida olov oldi. 134 nafar yo‘lovchi va ekipaj a’zolari evakuatsiya qilindi. Uch kishi halok bo‘ldi, qirqqa yaqin odam yaralandi. Layner butunlay yonib ketdi.
Izoh (0)