Бугун, 25 декабрь куни Сочи шаҳри яқинида Россия мудофаа вазирлигининг Ту-154 самолёти қулади. Унинг бортида 92 киши — санъаткорлар, ОАВ вакиллари ва ҳарбий хизматчилар бўлиб, улар Россия ҳаво-космик кучларининг Ҳмеймимдаги авиабазасига йўл олган эди.
Мазкур фожиа муносабати билан «ТАСС» агентлиги 2000 йилдан буён кузатилган Ту-154 самолётларининг қулаши билан боғлиқ ўнта воқеани эсга олди.
2001 йилнинг 4 июлида «Владивосток Авиа» компаниясининг Ту-154М йўловчи самолёти (борт рақами — RA-85845) Екатеринбург–Иркутск–Владивосток йўналиши бўйича ДД 352 рейсини амалга ошираётганида Иркутск аэропортига қўнишга уриниш пайтида ҳалокатга учради. Бортда бўлган 145 киши — 136 йўловчи ва тўққиз нафар экипаж аъзоси ҳалок бўлди. Ҳалокат сабаби — экипажда ўзаро ҳамкорликнинг бузилиши боис бошқарувнинг издан чиқиши.
2001 йил 4 октябрида «Сибирь» (бугунги S7 Airlines бренди) авиакомпаниясининг Ту-154М (борт рақами — RA-85693) йўловчи самолёти 1812 Тель-Авив–Новосибирск рейсини амалга ошириш чоғида Қора денгиз устида, Сочидан 200 километр жануби-ғарбда ҳалокатга учради. Бортда бўлган 78 киши — 66 нафар йўловчи ва 12 экипаж аъзолари ҳалок бўлди. Халқаро авиация қўмитаси тафтиши натижаларига кўра, самолётга Украинанинг С-200 зенит-ракета комплексининг ҳарбий машғулотлар чоғида учирилган ракетаси тегиб кетган. Украина фожиа учун юридик жавобгарликни расман тан олган эмас.
2002 йил 12 февралида Эроннинг Хуррамобод шаҳри аэропортидан 20 километр нарида Iran Airtour авиакомпаниясининг IRB956 рейсини амалга ошираётган Ту-154М (борт рақами — EP-MBS) самолёти ҳалокатга учради. Теҳрондан келаётган самолёт мураккаб об-ҳаво шароитида 2773 километр баландликда Кўҳи Сафид тоғига урилди. Бортда бўлган 119 киши — 107 нафар йўловчи ва 12 нафар экипаж аъзоси ҳалок бўлди.
2002 йил 1 июлида Боден кўли устида (Юберлинген шаҳри, Германия) авиадиспетчернинг хатоси туфайли «Башкирские авиалинии» компаниясининг (Россия) ВТС 2937 Москва–Барселона рейсини амалга ошираётган Ту-154М (борт рақами — RA-85816) йўловчи самолёти Германиянинг DHL компаниясига тегишли, Баҳрайндан Брюсселга DHX 611 юк рейсини амалга ошираётган Boeing 757-23APF (борт рақами — A9C-DHL) транспорт самолёти билан тўқнашиб кетди. Самолётлар бортида бўлган барча одам — 71 киши, шу жумладан, DHL’нинг икки учувчиси ва Россия самолётидаги 69 киши (уларнинг 52 нафари — Испанияга дам олишга кетаётган болалар) ҳалок бўлди. 2004 йил 24 февралида тўқнашган самолётларни йўналтирган авиадиспетчер Питер Нильсен ҳалокатда рафиқаси ва икки боласидан айрилган меъмор Виталий Калоев томонидан ўлдирилди.
2006 йил 22 августида «Пулково» авиакомпаниясининг 612 Анапа–Санкт-Петербург рейсини амалга ошираётган Ту-154М (борт рақами — RA-85185) йўловчи самолёти Сухая Балка қишлоғи (Донецк вилояти, Украина) яқинида қулади. 160 йўловчи ва ўн нафар экипаж аъзоси ҳалок бўлди.
2006 йил 1 сентябрда Iran Airtour авиакомпаниясининг Ту-154М (борт рақами — EM-MCF) йўловчи самолёти Эроннинг Машҳад шаҳри аэропортида қаттиқ қўнишни амалга оширди. Бандар-Аббосдан келаётган самолёт ерга текканда олд шассидаги нуқсон туфайли самолёт учиш-қўниш тасмасидан ташқарига чиқиб кетиб, олов олди. Бортда бўлган 148 кишидан (137 йўловчи ва 11 нафар экипаж аъзоси) 28 нафари ҳалок бўлди.
2009 йилнинг 15 июль куни Эроннинг Caspian Airlines авиакомпаниясига тегишли Ту-154М (борт рақами — EP-CPG) йўловчи самолёти 7908 Теҳрон–Ереван рейси бўйлаб парвоз қилаётганида Қазвин шаҳри яқинидаги Жаннатобод қишлоғида қулади. Диспетчерлар маълумотига қараганда, самолёт баландликка кўтарилишни тўхтатиб, 270 даражага айланган ва 1,5 дақиқа давомида қулаган. Бортда бўлган 168 киши — 15 нафар экипаж аъзоси ва 153 йўловчи ҳалок бўлди. Қурбонларнинг беш нафари Арманистон фуқаролари, қолганлар эса эронликлар эди.
2010 йил 10 апрелида Польша ҳарбий-ҳаво кучларининг Ту-154М самолёти «Смоленск–Северний» аэродромига (Россия) қўниш чоғида ҳалокатга учради. Самолёт бортида Польша президенти Лех Качиньский ҳамда Польша сиёсий ва ҳарбий раҳбарияти вакиллари бор эди. Улар Катинь қурбонлари хотирасига бағишлаб ташкил этилган мотам маросимига келаётган эди. 89 йўловчи ва етти нафар экипаж аъзосидан ҳеч ким омон қолмади.
2010 йил 4 декабрда «Дагестанские авиалинии» компаниясига тегишли, ЮХ372 Москва–Махачқалъа рейсини амалга ошираётган Ту-154М (борт рақами — RA-85744) йўловчи самолёти Москванинг «Домодедово» аэропорти учиш-қўниш тасмасидан чиқиб кетди. Бортда бўлган 171 кишидан (163 йўловчи ва саккиз нафар экипаж аъзоси) икки нафари ҳалок бўлди.
2011 йил 1 январида Россиянинг Kolavia авиакомпаниясига тегишли, 348 Сургут–Москва рейси бўйича учаётган Ту-154Б-2 (борт рақами — RA-85588) йўловчи самолёти Сургут аэропортида ердан юриш пайтида олов олди. 134 нафар йўловчи ва экипаж аъзолари эвакуация қилинди. Уч киши ҳалок бўлди, қирққа яқин одам яраланди. Лайнер бутунлай ёниб кетди.
Изоҳ (0)