Toshkentda Yoshlar haftaligining bir qismi — Milliy internet tanlovi doirasida “Robotlar jangi” uyushtirildi. “Kamolot” harakatining ma’lum qilishicha, birinchi marta mamlakat miqyosida o‘tkazilgan tanlovda 30 ga yaqin talaba va o‘quvchilar o‘z robotlari bilan qatnashgan.
Xabar berishlaricha, “Robotlar jangi” tanlovi O‘zbekiston Axborot texnologiyalari va kommunikatsiyalarini rivojlantirish vazirligi, “Kamolot” yoshlar ijtimoiy harakati, BMT Taraqqiyot dasturi, Toshkentdagi Turin politexnika universiteti, Toshkentdagi Inha universiteti va Toshkent axborot texnologiyalari universiteti hamkorligida tashkil etilgan.
Janglar ikki — MINI-Sumo va LEGO-Sumo yo‘nalishlari bo‘yicha o‘tkazilgan. Har ikkala yo‘nalish bo‘yicha Toshkentdagi Turin politexnika unirvesiteti talabalari ishlab chiqqan robotlar g‘alaba qozongan.
Universitet ma’muriyatidan “Daryo”ga ma’lum qilishlaricha, oliygohning Robo Technics jamoasi MINI-Sumo yo‘nalishida birinchi o‘rinni egallagan, RDCM jamoasi esa LEGO-Sumo robotlar jangida tengsiz deb topilgan.
Janglar boshlanishidan avval “Eng yaxshi robototexnik”, “Eng yaxshi jamoa”, “Eng yaxshi texnologik robot”, “Eng yaxshi dizayndagi robot” nominatsiyalari bo‘yicha ham g‘oliblar aniqlanishi aytilgan edi. Biroq tanlov yakunlari haqidagi rasmiy xabarlarda bu nominatsiyalar g‘oliblari tilga olinmagan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)