Germaniyaning Frayburg-im-Braysgau shahrida me’moriy qiyofasi Frey Architekten firmasi tomonidan yaratilgan 16 qavatli Smart Green Tower binosi barpo etiladi. Loyihani ishlab chiqishda Fraungofer nomli Germaniya quyosh energotizimlari instituti va Siemens konserni ishtirok etadi, deya xabar beradi “TASS”.
Uy past yorug‘likka moslashtirilgan fotoelektr panellar bilan jihozlanadi. Loyiha mualliflari ularning bino fasadida joylashgani va o‘zaro bir-biri bilan bog‘lanish tizimini yangilik deb atamoqda. Energiya 0,5 megavattli litiy-ionli batareyada to‘planadi. Unga qo‘shimcha ravishda uzluksiz ta’minotga yordam beradigan, qayta tiklanuvchi elektr energiyasidagi uzilishlarni birxillashtiruvchi vanadiyli redoks akkumulyatorlar o‘rnatiladi.
Uy ichida elektr simlari doimiy kuchlanishdagi tok bilan ta’minlanadi. Biroq bino o‘zidagi ortiqcha elektr energiyasini tarmoqqa uzatish imkoniga ega bo‘ladi.
Bu Germaniyadagi tiklanuvchi energiyadan foydalanishga asoslangan birinchi qurilish loyihasi emas. Frey Architekten firmasi loyihasi bo‘yicha tashqi manbalardan energiya olmaydigan yoki odatdagidan o‘nlab barobar kam iste’mol qiladigan uylardan tashkil topgan “Xaydelberg” uy-joy kompleksi qurilmoqda.
Germaniya hukumati tomonidan qabul qilingan Energetika konsepsiyasiga ko‘ra, 2050-yilga kelib mamlakatda elektr energiyasiga bo‘lgan talab to‘liq qayta tiklanuvchi energiya manbalari hisobidan qoplanishi lozim.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)