Istanbulda Bosfor bo‘g‘ozi ostidan o‘tgan yerosti avtotrassasi — “Yevrosiyo tunneli” ochildi. Ochilish marosimida Turkiya prezidenti Rajab Toyyib Erdo‘g‘on, bosh vazir Binoli Yildirim va hukumat a’zolari ishtirok etdi. Bu haqda “TASS” xabar bermoqda.
14,5 kilometr uzunlikdagi tunnel Istanbulning Osiyo va Yevropadagi qismlari — Geztepe va Kazlicheshmeni birlashtiradi. Yo‘lning 5,4 kilometri bevosita Bosfor ostida, dengiz sathidan 106 metr chuqurlikda yotqizilgan. U zilzila, sunami va tuproq bosimini ko‘tarishga qodir.
Dastlabki hisob-kitoblarga ko‘ra, tunneldan har kuni 120 ming avtomobil o‘tadi. Yo‘l haqi yengil mashinalarga 4, mikroavtobuslar uchun 6 dollarni tashkil etadi, transportning boshqa turlari harakatlanishi man etilgan.
Tunnel ochilganidan so‘ng Istanbulning ikki qismi o‘rtasidagi masofani bosib o‘tish vaqti 1 soat va 40 daqiqadan 15 daqiqagacha qisqaradi. Uning qurilishi 5 yil davom etdi va xususiy konsorsiumga 1,2 milliard dollarga tushdi. Konsorsium tunnelni 24,5 yil davomida boshqaradi va shundan so‘ng davlat ixtiyoriga topshiradi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)