Истанбулда Босфор бўғози остидан ўтган ерости автотрассаси — «Евросиё туннели» очилди. Очилиш маросимида Туркия президенти Ражаб Тоййиб Эрдўғон, бош вазир Биноли Йилдирим ва ҳукумат аъзолари иштирок этди. Бу ҳақда «ТАСС» хабар бермоқда.
14,5 километр узунликдаги туннел Истанбулнинг Осиё ва Европадаги қисмлари — Гезтепе ва Казличешмени бирлаштиради. Йўлнинг 5,4 километри бевосита Босфор остида, денгиз сатҳидан 106 метр чуқурликда ётқизилган. У зилзила, цунами ва тупроқ босимини кўтаришга қодир.
Дастлабки ҳисоб-китобларга кўра, туннелдан ҳар куни 120 минг автомобиль ўтади. Йўл ҳақи енгил машиналарга 4, микроавтобуслар учун 6 долларни ташкил этади, транспортнинг бошқа турлари ҳаракатланиши ман этилган.
Туннель очилганидан сўнг Истанбулнинг икки қисми ўртасидаги масофани босиб ўтиш вақти 1 соат ва 40 дақиқадан 15 дақиқагача қисқаради. Унинг қурилиши 5 йил давом этди ва хусусий консорциумга 1,2 миллиард долларга тушди. Консорциум туннелни 24,5 йил давомида бошқаради ва шундан сўнг давлат ихтиёрига топширади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)