Futbol bo‘yicha O‘zbekiston Oliy Ligasining 2017-yilgi mavsumi 4—5-mart kunlari start oladi. Bugun — 20-dekabr kuni O‘FF anjumanlar zalida PFL yangi mavsum uchun qur’a tashlash marosimini o‘tkazdi.
Oliy Liganing 2017-yilgi mavsumida 16 jamoa chempionlik uchun kurash olib boradi. Bunda sovrinli o‘rinlarni qo‘lga kiritgan jamoalarga mukofot pullari taqdim etilishi borasida ma’lumot berilmagan.
Qur’a tashlash marosimida so‘z olgan PFL bosh direktori Farhod Magomedov 2017-yilgi mavsumda O‘zbekiston Superkubogi uchun o‘yin bo‘lmasligi haqida aytib o‘tdi.
Oliy Liganing ilk turida amaldagi chempion “Lokomotiv” Muborakda “Mash’al” mehmoni bo‘ladi. Kumush medal sohibi “Bunyodkor” o‘z maydonida “So‘g‘diyona”ni qabul qilsa, “Paxtakor” Toshkentda “Qizilqum” bilan, “Nasaf” vodiyda “Qo‘qon—1912” bilan bellashadi.
Ma’lumot uchun, 2016-yilgi mavsumda mamlakat Superkubogida Qarshining “Nasaf” klubi g‘oliblikni qo‘lga kiritdi. Mamlakat Kubogi va chempionligi Toshkentning “Lokomotiv” futbol klubiga nasib qildi.
2016-yil yakunlariga ko‘ra “Andijon” futbol klubi Oliy Ligadan tushib ketdi. Uning o‘rnini 1-ligada peshqadam bo‘lgan Samarqandning “Dinamo” klubi egalladi.
Osiyo Chempionlar Ligasi musobaqasida O‘zbekiston sharafini himoya qiladigan klublar yangi mavsumni qolganlardan ertaroq boshlaydi. 31-yanvar kuni “Nasaf” o‘tish bosqichining ikkinchi raundida Bahraynning “Al-Hid” klubiga qarshi o‘yin o‘tkazsa, 7-fevral kuni “Bunyodkor” Qatarning “Al-Jaish” klubiga raqib bo‘ladi.
Chempionlar Ligasining guruh bosqichiga to‘g‘ridan-to‘g‘ri yo‘llanma olgan O‘zbekistonning yagona klubi “Lokomotiv” xalqaro maydondagi ilk o‘yinini 20-fevral kuni o‘tkazadi.
Izoh (0)