Shanxay hamkorlik tashkiloti bosh kotibi Rashid Alimov 17-dekabr, shanba kuni tuzilma tashkil etilganining 15 yilligiga bag‘ishlangan xalqaro marafonga start berdi. Musobaqa Xitoyning Kunmin shahridagi Dyanchi ko‘li qirg‘og‘ida bo‘lib o‘tmoqda, deb xabar beradi “TASS”.
ShHTga a’zo davlatlar elchilari va vakillari masofaning birinchi 200 metrini bosib o‘tdi. Musobaqalarda jami 15,6 ming kishi qatnashmoqda, ularning aksariyati professional sportchi hisoblanadi. Marafon tashkilot geografik doirasidan chetga chiqqani va qatnashchilar to‘rt qit’a, 23 mamlakatdan kelgani bildirilmoqda.
Musobaqalarda 42, 21, 10, 5 va 1 kilometrga yugurishlar bo‘lib o‘tadi. To‘liq masofa — 42 kilometrga chopishda 2,8 mingdan ortiq sportchi ishtirok etadi. Ular orasida dunyo miqyosida nom qozongan atletlar, jumladan, to‘liq marafondagi eng yaxshi natijalardan biri (2 soat va 10 daqiqa) egasi keniyalik Jonston Mayo bor. Birinchi o‘rin uchun mukofot 40 ming dollarni tashkil etadi.
Izoh (0)