Rossiyalik og‘ir vaznli bokschi Aleksandr Povetkindan doping — taqiqlangan ostarin moddasi topildi. Bu haqda u kanadalik Bermeyn Stivernga qarshi jangni boshlashiga bir soat qolganida ma’lum bo‘ldi — mazkur jang WBC yo‘nalishi bo‘yicha muvaqqat chempionni aniqlab berishi lozim edi. Doping haqidagi yangilikdan so‘ng, Stivernning jamoasi jang o‘tkazilmasligini ma’lum qildi. Povetkin diskvalifikatsiya qilinishi va sportchilik faoliyatini erta yakunlashi mumkin, deb yozadi Meduza.
Povetkin — rossiyalik eng mashhur og‘ir vaznli bokschi. Afina—2004 Olimpiadasidagi g‘alabadan so‘ng, Povetkin professional boksga o‘tgan. 2011-yili u WBA yo‘nalishi bo‘yicha chempionga aylangan. 2013-yili faoliyatidagi hozircha yagona mag‘lubiyatni tan olgan va mazkur yo‘nalish bo‘yicha mutlaq chempionlik kamarini qo‘lga kirita olmagan — Povetkin ochkolar bo‘yicha ukrainalik Vladimir Klichkoga imkoniyatni boy bergan edi.
17-dekabr kuni Povetkin WBC yo‘nalishi bo‘yicha muvaqqat chempionlik kamari uchun jang o‘tkazishi lozim edi. Rossiyalik bokschiga kanadalik Bermeyn Stivern raqib edi. Mazkur to‘qnashuvda g‘alaba qozonsa, Povetkin asosiy sovrin uchun amerikalik Deontey Uaylderga qarshi ringga ko‘tarilish huquqiga ega bo‘lardi.
Jangga ozgina vaqt qolganida, Povetkindan doping topilgani ma’lum bo‘ldi. Bu haqda Jahon boks kengashi (WBC) rahbari Maurisio Sulaymon Twitter’dagi sahifasida yozdi. Povetkinning namunalarida bodibilderlar orasida ommabop bo‘lgan taqiqlangan modda — ostarin topilgan. Stivernning jamoasi shu zahoti jangdan voz kechdi. Biroq Povetkin 17-dekabr kuni baribir ringga chiqishi kutilmoqda. Promouterlar unga raqib topib bo‘lgan — fransiyalik og‘ir vaznli bokschi Joan Dyuop. Bu jangda hech qanday sovrin o‘ynalmaydi.
Povetkin bu yil bir marta doping bilan qo‘lga tushgan edi. 2016-yil 13-may kuni bokschining namunalaridan meldoniy moddasi topilgan edi. Shu sababli yilning eng kutilgan jangi — Povetkinning amerikalik Deontey Uaylder bilan to‘qnashuv yo‘qqa chiqqan. Rossiyalik sportchining vakillari Povetkin haqiqatan ham bu dori vositasini qabul qilgani, biroq meldoniy taqiqlangan moddalar ro‘yxatiga kiritilishidan bir necha oy avval bu preparatdan foydalanishni to‘xtatganini bildirgan edi. O‘shanda bokschini diskvalifikatsiya qilmaslik qaroriga kelingan, biroq uning Uaylder bilan jangi bekor qilingan edi.
Povetkinning promouterlari “amerikalik hamkorlar provokatsiya qilayotgani” haqida gapirmoqda. “Biz Xalqaro antidoping agentligi tomonidan va ‘amerikalik hamkorlarimiz’ tomonidan turli provokatsiyalar bo‘lishini, mana shunday vaziyat yuzaga kelishini kutgandik”, — deya izoh berdi promouter Aleksey Titov Znak nashriga bergan intervyusida. Uning so‘zlariga ko‘ra, shu sababli ham jamoa avvaldan — har ehtimolga qarshi — fransiyalik bokschi bilan shartnoma imzolab qo‘ygan bo‘lgan.
Povetkin diskvalifikatsiya qilinishi ehtimoli katta. Uning keyingi faoliyati so‘roq ostida. Meldoniy bilan bog‘liq voqeadan so‘ng, Jahon boks kengashi Povetkinni keyingi bir yil davomida namunalarida yana doping topilsa, jazo choralari ko‘rilishi haqida ogohlantirgan edi. Agar qo‘shimcha tekshiruvlar Povetkin haqiqatan ham doping qabul qilganini tasdiqlasa, bokschi diskvalifikatsiya qilinadi. Ekspert Aleksandr Belenkiyning aytishicha, bu 37 yoshli sportchi uchun faoliyat intihosi, degandek gap.
Ushbu doping mojarosi rossiyalik olimpiyachilarning doping mojarosi bilan bog‘liq emas. Jahon boks kengashi — professional tashkilot bo‘lib, unda dopingga nisbatan havaskor sportdagidan boshqacharoq qoidalar amal qiladi. Povetkin — Stivern jangi oldidan tashkil etilgan tekshiruv Ko‘ngilli ravishda dopingga tekshirish assotsiatsiyasi (VADA) tomonidan o‘tkazilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)