Футбол бўйича Ўзбекистон Олий Лигасининг 2017 йилги мавсуми 4—5 март кунлари старт олади. Бугун — 20 декабрь куни ЎФФ анжуманлар залида ПФЛ янги мавсум учун қуръа ташлаш маросимини ўтказди.
Олий Лиганинг 2017 йилги мавсумида 16 жамоа чемпионлик учун кураш олиб боради. Бунда совринли ўринларни қўлга киритган жамоаларга мукофот пуллари тақдим этилиши борасида маълумот берилмаган.
Қуръа ташлаш маросимида сўз олган ПФЛ бош директори Фарҳод Магомедов 2017 йилги мавсумда Ўзбекистон Суперкубоги учун ўйин бўлмаслиги ҳақида айтиб ўтди.
Олий Лиганинг илк турида амалдаги чемпион «Локомотив» Муборакда «Машъал» меҳмони бўлади. Кумуш медаль соҳиби «Бунёдкор» ўз майдонида «Сўғдиёна»ни қабул қилса, «Пахтакор» Тошкентда «Қизилқум» билан, «Насаф» водийда «Қўқон—1912» билан беллашади.
Маълумот учун, 2016 йилги мавсумда мамлакат Суперкубогида Қаршининг «Насаф» клуби ғолибликни қўлга киритди. Мамлакат Кубоги ва чемпионлиги Тошкентнинг «Локомотив» футбол клубига насиб қилди.
2016 йил якунларига кўра «Андижон» футбол клуби Олий Лигадан тушиб кетди. Унинг ўрнини 1-лигада пешқадам бўлган Самарқанднинг «Динамо» клуби эгаллади.
Осиё Чемпионлар Лигаси мусобақасида Ўзбекистон шарафини ҳимоя қиладиган клублар янги мавсумни қолганлардан эртароқ бошлайди. 31 январь куни «Насаф» ўтиш босқичининг иккинчи раундида Баҳрайннинг «Ал-Ҳид» клубига қарши ўйин ўтказса, 7 февраль куни «Бунёдкор» Қатарнинг «Ал-Жаиш» клубига рақиб бўлади.
Чемпионлар Лигасининг гуруҳ босқичига тўғридан-тўғри йўлланма олган Ўзбекистоннинг ягона клуби «Локомотив» халқаро майдондаги илк ўйинини 20 февраль куни ўтказади.
Изоҳ (0)