10-dekabr, shanba kuni taxminan 22:30 da (Toshkent vaqti bilan 11-dekabr 00:30 da) Istanbuldagi Vodafone Arena stadionining shimoli-g‘arbiy devori yonidan o‘tgan yo‘lda hamda arena yaqinidagi bog‘da portlashlar yuz berdi. Yo‘lda politsiya maxsus topshiriqli bo‘linmalari o‘tirgan avtobus yaqinida portlovchi moddalar bilan to‘ldirilgan mashina portlatib yuborildi. Bir necha soniyadan so‘ng boqqa xudkush terrorchi hujum qildi.
So‘nggi ma’lumotlarga ko‘ra, qurbonlar soni 29 kishini tashkil qildi, ularning 27 nafari huquq-tartibot organlari xodimlaridir. 166 kishi jarohatlandi, ularning ko‘pchiligi og‘ir ahvolda. Turkiya ichki ishlar vaziri teraktni tashkil qilishga aloqadorlikda gumonlanib 10 kishi hibsga olinganini bildirdi. Mamlakatda milliy motam e’lon qilindi.
Ushbu qayg‘uli voqea munosabati bilan “TASS” 2015–2016-yillarda Turkiyada ro‘y bergan eng yirik teraktlarni yodga oldi.
Ma’lumotlarga qaraganda, shu davr ichida mamlakatda jami 20 dan ortiq qo‘poruvchilik harakatlari sodir etilgan bo‘lib, ularda 400 dan ortiq odam halok bo‘ldi.
2015-yil 20 iyulda Shonliurfa viloyatining Suruch shahrida (Suriya chegarasiga yaqin) sodir etilgan teraktda 32 kishi halok bo‘ldi, 100 ga yaqin odam jarohatlandi. Portlash yosh sotsialistlar jamiyatlari federatsiyasi vakillari istiqomat qiluvchi Amara madaniy markazi binosi kirishida ro‘y berdi. Sotsialistlar Suriyaning asosan kurdlar istiqomat qiladigan Kobani shahrini IShIDning bir necha oylik nazoratidan so‘ng qayta tiklashga yo‘l olayotgan edi. Teraktni 20 yoshli xudkush Abdurahmon Olago‘z sodir etgani aniqlandi. Shuningdek, Turkiya fuqarosi bo‘lmish yigit ilgari Suriyada IShID tarafida turib harbiy to‘qnashuvlarda ishtirok etgani ma’lum bo‘ldi.
2015-yil 10-oktabrda Anqara markaziy temir yo‘l vokzaliga eltuvchi estakada yaqinida ikkita portlash amalga oshirildi. U yerda kasaba uyushmalari va jamoat tashkilotlari vakillari tinchlik uchun hamda kurd terrorchilariga qarshi namoyish o‘tkazish maqsadida to‘planayotgan edi. Portlashlarni sodir etgan xudkushlarning har birida besh kilogrammdan trotil bo‘lgani aniqlandi. Mamlakat tarixidagi eng qonli deb tan olingan teraktda 102 kishi halok bo‘ldi, 300 dan ortiq odam tibbiyot xodimlaridan yordam oldi. Terakt ijrochilaridan biri Suruch portlashini uyushtirgan Abdurahmon Olago‘zning ukasi Yunus Emro Olago‘z edi.
2016-yil 17-fevralda Anqarada Turkiya qurolli kuchlari xizmat avtobusi yaqinida minalashtirilgan mashina havoga uchirildi. 28 kishi halok bo‘ldi, 61 kishi jarohatlandi. Qurbonlarning aksariyati harbiy xizmatchilar edi. “Kurdiston ozodligi qirg‘iylari” radikal harakati terakt uchun javobgarlikni zimmasiga oldi.
2016-yil 13-martda Anqaraning bosh ko‘chasi — Otaturk nomli xiyobon yaqinidagi avtobus bekatida minalashtirilgan avtomobil portlatib yuborildi. Buning oqibatida 37 kishi halok bo‘ldi, 125 kishi jarohat oldi. IIV ma’lumotlariga qaraganda, terakt ijrochilari bo‘lgan ikki Turkiya fuqarosi Kurdiston ishchi partiyasiga aloqadordir. Ulardan biri — 1992-yilda tug‘ilgan Sahar Chag‘la Demir ismli qiz. “Kurdiston ozodligi qirg‘iylari” radikal harakati terakt uchun javobgarlikni zimmasiga oldi.
2016-yil 28-iyunda Istanbuldagi Otaturk nomli xalqaro aeroport yo‘lovchi terminalining turli qismlarida uch nafar xudkush o‘zini portlatib yuborishi oqibatida 45 kishi, shu jumladan, 19 nafar chet el fuqarosi halok bo‘ldi, 240 kishi yaralandi. Turkiya ichki ishlar vaziri Efkan Ala 30-iyun kuni parlamentdagi chiqishida dalillar terakt ijrochisi IShID guruhi ekanligini ko‘rsatayotganini ma’lum qildi.
2016-yil 20-avgust kuni Turkiya janubidagi Gaziantep shahrida to‘y marosimi chog‘ida xudkushlik hujumi uyushtirildi. Halok bo‘lgan 57 kishidan 34 nafari bolalar va o‘smirlar edi. Xudkush 12–14 yoshlar atrofida edi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)