Yamandagi harbiy bazada halok bo‘lganlar soni 50 kishiga yetdi

Yamanning Adan shahri yaqinidagi harbiy bazada 10-dekabr, shanba kuni ro‘y bergan portlash qurbonlari soni 50 kishiga yetdi. Bu haqda, mahalliy xavfsizlik kuchlari vakillariga tayanib, Reuters ma’lum qildi, deb xabar beradi “TASS”.

Oldinroq terakt oqibatida 30 kishi halok bo‘lgani bildirilgandi.

Shahar shimoli-sharqidagi As-Sulban harbiy lagerida xudkush terrorchi portlovchi qurilmani harakatga keltirdi. Buning oqibatida halok bo‘lgan va yaralanganlar orasida yamanlik harbiylar hamda xizmatga yangi chaqirilganlar bor.

Reuters agentligiga ko‘ra, hujum uchun javobgarlikni IShID zimmasiga oldi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.