Shvetsiy qiroli Karl XVI Gustav 10-dekabr, shanba kuni Stokgolm filarmoniyasida tibbiyot, fizika, kimyo va iqtisodiyot bo‘yicha 2016-yilgi Nobel mukofotlarini topshirdi, deb yozadi “TASS”. Dunyodagi eng nufuzli mukofotning to‘qqiz nafar laureati qirolning qo‘lidan diplomlar va oltin medallarni qabul qilib oldi.
Fiziologiya va tibbiyot sohasida yaponiyalik professor Yosinori Osumi autofagiya mexanizmi — tirik organizmlardagi hujayralarining o‘z-o‘zini tozalash tabiiy protsessini kashf qilgani uchun taqdirlandi.
“Fizika” bo‘limida esa AQSh va britaniyalik uch nafar olim “topologik fazali o‘tishlar va materiyaning topologik fazalarini nazariy jihatdan kashf qilgani uchun” Nobel bilan mukofotlandi.
Kimyo sohasida molekulyar mashinalarni loyihalashtirgan va sintezlagan bir guruh olimlar mukofotga ega chiqdi.
Adabiyot sohasidagi Nobel sovrindori Dilan, avval xabar berilganidek, marosimda ishtirok etmadi, ammo uning sharafiga olqishlar yangradi, amerikalik qo‘shiqchi va shoira Patti Smit esa uning A Hard Rain's a-Gonna Fall qo‘shig‘ini kuyladi.
Izoh (0)