BMT bosh kotibi Istanbulda sodir etilgan teraktlarni qoralab chiqdi

BMT bosh kotibi Pan Gi Mun Istanbulda sodir etilgan va o‘nlab kishi qurbon bo‘lgan qo‘sh teraktni qoraladi. Bu haqda “TASS” xabar bermoqda.

“BMT bosh kotibi qurbonlarning oilasi, Turkiya xalqi va hukumatiga chuqur hamdardlik bildiradi. Shuningdek, yaralanganlar tezroq oyoqqa turishini tilab qoladi. U mazkur teraktni uyushtirganlar tezda aniqlanishi va javobgarlikka tortilishiga umid qiladi”, — deyiladi kommyunikeda.

Portlashlar Istanbulda mahalliy vaqt bilan 10-dekabr, shanba kuni taxminan 22:30 da (Toshkent vaqti bilan 11-dekabr 00:30 da) Vodafone Arena stadionining shimoli-g‘arbiy devori yonidan o‘tgan yo‘lda hamda arena yaqinidagi bog‘da yuz berdi. Yo‘lda politsiya maxsus topshiriqli bo‘linmalari o‘tirgan avtobus yaqinida portlovchi moddalar bilan to‘ldirilgan mashina portlatib yuborildi. Bir necha soniyadan so‘ng boqqa xudkush terrorchi hujum qildi.

So‘nggi ma’lumotlarga ko‘ra, qurbonlar soni 29 kishini tashkil qildi, ularning 27 nafari huquq-tartibot organlari xodimlaridir. 166 kishi jarohatlandi, ularning ko‘pchiligi og‘ir ahvolda.

Turkiya ichki ishlar vaziri teraktni tashkil qilishga aloqadorlikda gumonlanib 10 kishi hibsga olinganini bildirdi. Mamlakatda milliy motam e’lon qilindi.