10 декабрь, шанба куни тахминан 22:30 да (Тошкент вақти билан 11 декабрь 00:30 да) Истанбулдаги Vodafone Arena стадионининг шимоли-ғарбий девори ёнидан ўтган йўлда ҳамда арена яқинидаги боғда портлашлар юз берди. Йўлда полиция махсус топшириқли бўлинмалари ўтирган автобус яқинида портловчи моддалар билан тўлдирилган машина портлатиб юборилди. Бир неча сониядан сўнг боққа худкуш террорчи ҳужум қилди.
Сўнгги маълумотларга кўра, қурбонлар сони 29 кишини ташкил қилди, уларнинг 27 нафари ҳуқуқ-тартибот органлари ходимларидир. 166 киши жароҳатланди, уларнинг кўпчилиги оғир аҳволда. Туркия ички ишлар вазири терактни ташкил қилишга алоқадорликда гумонланиб 10 киши ҳибсга олинганини билдирди. Мамлакатда миллий мотам эълон қилинди.
Ушбу қайғули воқеа муносабати билан «ТАСС» 2015–2016 йилларда Туркияда рўй берган энг йирик терактларни ёдга олди.
Маълумотларга қараганда, шу давр ичида мамлакатда жами 20 дан ортиқ қўпорувчилик ҳаракатлари содир этилган бўлиб, уларда 400 дан ортиқ одам ҳалок бўлди.
2015 йил 20 июлда Шонлиурфа вилоятининг Суруч шаҳрида (Сурия чегарасига яқин) содир этилган терактда 32 киши ҳалок бўлди, 100 га яқин одам жароҳатланди. Портлаш ёш социалистлар жамиятлари федерацияси вакиллари истиқомат қилувчи Амара маданий маркази биноси киришида рўй берди. Социалистлар Суриянинг асосан курдлар истиқомат қиладиган Кобани шаҳрини ИШИДнинг бир неча ойлик назоратидан сўнг қайта тиклашга йўл олаётган эди. Терактни 20 ёшли худкуш Абдураҳмон Олагўз содир этгани аниқланди. Шунингдек, Туркия фуқароси бўлмиш йигит илгари Сурияда ИШИД тарафида туриб ҳарбий тўқнашувларда иштирок этгани маълум бўлди.
2015 йил 10 октябрда Анқара марказий темир йўл вокзалига элтувчи эстакада яқинида иккита портлаш амалга оширилди. У ерда касаба уюшмалари ва жамоат ташкилотлари вакиллари тинчлик учун ҳамда курд террорчиларига қарши намойиш ўтказиш мақсадида тўпланаётган эди. Портлашларни содир этган худкушларнинг ҳар бирида беш килограммдан тротил бўлгани аниқланди. Мамлакат тарихидаги энг қонли деб тан олинган терактда 102 киши ҳалок бўлди, 300 дан ортиқ одам тиббиёт ходимларидан ёрдам олди. Теракт ижрочиларидан бири Суруч портлашини уюштирган Абдураҳмон Олагўзнинг укаси Юнус Эмро Олагўз эди.
2016 йил 17 февралда Анқарада Туркия қуролли кучлари хизмат автобуси яқинида миналаштирилган машина ҳавога учирилди. 28 киши ҳалок бўлди, 61 киши жароҳатланди. Қурбонларнинг аксарияти ҳарбий хизматчилар эди. «Курдистон озодлиги қирғийлари» радикал ҳаракати теракт учун жавобгарликни зиммасига олди.
2016 йил 13 мартда Анқаранинг бош кўчаси — Отатурк номли хиёбон яқинидаги автобус бекатида миналаштирилган автомобиль портлатиб юборилди. Бунинг оқибатида 37 киши ҳалок бўлди, 125 киши жароҳат олди. ИИВ маълумотларига қараганда, теракт ижрочилари бўлган икки Туркия фуқароси Курдистон ишчи партиясига алоқадордир. Улардан бири — 1992 йилда туғилган Саҳар Чағла Демир исмли қиз. «Курдистон озодлиги қирғийлари» радикал ҳаракати теракт учун жавобгарликни зиммасига олди.
2016 йил 28 июнда Истанбулдаги Отатурк номли халқаро аэропорт йўловчи терминалининг турли қисмларида уч нафар худкуш ўзини портлатиб юбориши оқибатида 45 киши, шу жумладан, 19 нафар чет эл фуқароси ҳалок бўлди, 240 киши яраланди. Туркия ички ишлар вазири Эфкан Ала 30 июнь куни парламентдаги чиқишида далиллар теракт ижрочиси ИШИД гуруҳи эканлигини кўрсатаётганини маълум қилди.
2016 йил 20 август куни Туркия жанубидаги Газиантеп шаҳрида тўй маросими чоғида худкушлик ҳужуми уюштирилди. Ҳалок бўлган 57 кишидан 34 нафари болалар ва ўсмирлар эди. Худкуш 12–14 ёшлар атрофида эди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)