Michigan oliy sudi AQSh prezidentligiga “Yashillar” partiyasidan sobiq nomzod Jill Staynning apellyatsiyasini rad etdi. U mazkur shtatda davlat rahbarligiga saylovlar byulletenlarini qayta hisoblashni to‘xtatish haqidagi sud qarorini bekor qilishni talab etgandi. Bu haqda “TASS” xabar bermoqda.
Michigan federal sudi 5-dekabr, dushanba kuni Staynning shtatda ovozlarni qayta hisoblash bo‘yicha so‘rovi yuzasidan ijobiy qaror qabul qilgan va shundan so‘ng zudlik bilan tekshiruv boshlangandi. Biroq keyinchalik sud Stayn Michiganda saylovchilarning juda kam ovozini to‘plagani sababli ushbu jarayonni o‘tkazish maqsadga muvofiq emasligini bildirib, o‘z hukmini bekor qildi. Shundan so‘ng sobiq nomzod shtat oliy sudiga murojaat etdi.
Stayn Pensilvaniya va Viskonsin shtatlarida ham ovozlar qayta hisoblab chiqilishini talab qilmoqda. Viskonsinda sud 1-dekabr kuni boshlangan byulletenlarni qayta hisoblashni to‘xtatishni rad etdi. Pensilvaniyada esa bu bo‘yicha 12-dekabr, dushanba kuni qaror qabul qilinadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)