Qirg‘izistonda 11-dekabr, yakshanba kuni bo‘lib o‘tadigan konstitutsiyaga o‘zgartirishlar bo‘yicha referendum va mahalliy kengashlarga saylovlar oldidan “Jimlik kuni” boshlandi. Bu haqda “TASS” xabar bermoqda.
Referendum ro‘yxatlarda qayd etilgan saylovchilarning 30 foizdan oshig‘i ishtirok etgan taqdirda bo‘lib o‘tgan hisoblanadi. Konstitutsiyaga kiritish taklif etilayotgan o‘zgarishlar qabul qilinishi uchun ularni ovoz berishda qatnashganlarning yarmidan ortig‘i ma’qullashi lozim.
Shunday bo‘lgan taqdirda kelgusi yil dekabridan boshlab Qirg‘izistonda prezident vakolatlari qisqartirilib, bosh vazir va parlament huquqlari kengaytiriladi, shuningdek, sud va huquq-tartibot tizimida islohotlar o‘tkaziladi.
Referendum bilan bir paytda shahar va qishloq kengashlari deputatlari saylovi o‘tkaziladi. Oxirgi ma’lumotlarga ko‘ra, shaharlardagi 595 deputatlik o‘rniga 35 siyosiy partiyaning salkam 7 ming nomzodi da’vogarlik qilmoqda.
Eslatib o‘tamiz, oldinroq Qirg‘izistondagi joylashgan barcha saylov uchastkalari ma’lumotlarni avtomatik tarzda hisoblovchi ovoz berish elektron qutilari bilan jihozlangani ma’lum qilingandi.
Izoh (0)