AQShda mavjud adliya tizimi qo‘sh standartlarga asoslangan va ko‘pincha elita vakillariga shafqatsiz jazolardan qochib qolish imkonini beradi, oddiy odamlar esa qonun bo‘yicha qat’iy ta’qib qilinadi. Bunday fikrni Amerika maxsus xizmatlari sobiq xodimi Edvard Snouden Yahoo News onlayn-portaliga bergan intervyusida aytib o‘tdi, deb yozadi “TASS”.
“AQShda ikki qavatli adliya tizimi amal qiladi, bunda hukumat bilan chambarchas bog‘liq bo‘lgan yoki g‘oyatda ko‘p resurslardan foydalana oladigan odamlar juda yengil jazolar bilan qutulib qoladi”, — dedi Snouden.
Misol tariqasida u yangi saylangan prezident Donald Trampning ma’muriyatida davlat kotibi lavozimiga nomzodlardan biri bo‘lgan Markaziy razvedka boshqarmasi sobiq direktori Devid Petreusni keltirib o‘tdi. 2012-yilda Petreus jurnalist Pola Broduellga maxfiy ma’lumotni berib yuborgani oshkor bo‘lgach, MRB direktorligidan iste’foga chiqishga majbur bo‘lgan edi.
Snoudenning eslatishicha, hukumat MRB sobiq direktorini faqat mayda qonunbuzarlikda ayblagan, xolos. Petreus o‘z aybini tan olganidan so‘ng, u shartli ravishda ikki yilga ozodlikdan mahrum etilgan va 100 ming dollar jarimaga tortilgan edi.
“U o‘zi fosh qilgan maxfiy axborot turiga qaramay (AQShning maxfiy harbiy dasturlari va Petreusning mamlakat prezidenti bilan suhbatlari mazmuni), u bir kun ham qamoqda o‘tirmadi”, — dedi Snouden. Uning o‘zi esa uzoq muddatli qamoqqa mahkum etilishi mumkin.
Izoh (0)