Janubiy Koreya parlamentida mamlakat prezidenti Pak Kin Xega impichment e’lon qilish uchun yetarli ovoz to‘plandi. Bu haqda Yonhap agentligi manbalariga tayanib, “Interfaks” xabar bermoqda. 

Davlat rahbarini lavozimidan chetlatish uchun 300 deputatdan kamida 200 nafari buni yoqlab ovoz berishi kerak. Muxolifat va mustaqil deputatlar jami 172 ovozga ega. Shu sababli hukmron “Senuri” partiyasining kamida 28 nafar deputati qo‘llab-quvvatlashi talab etiladi. Partiya vakili Xvan Yan Chul bunga erishish mumkinligini bildirdi. 

“Prezidentning kechagi chiqishidan so‘ng impichment zarurligiga shubha qilishimizdan xavotir bor edi. Biroq endi qat’iy aytish mumkinki, bu masalaga munosabatimiz yanada mustahkamlandi”, — deya bayonot berdi vakil. Oldinroq Pak Kin Xe buning uchun zarur siyosiy sharoitlar tug‘ilgan taqdirda lavozimini tark etishga tayyorligini bildirgandi. 

Parlamentda prezidentga impichment masalasida ovoz berish 2—9-dekabr oralig‘ida o‘tkazilishi rejalashtirilgan.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.