Bayden va Barzoniy Iroq hukumati hamda kurdlarning IShIDga qarshi kurashdagi hamkorligini muhokama qildi

AQSh vitse-prezidenti Jozef Bayden Iroq Kurdistoni rahbari Mas’ud Barzoniy bilan telefon orqali muloqoti chog‘ida Mosulni ozod etish kampaniyasi, shuningdek, Iroq hududiy yaxlitligini saqlash muhimligini muhokama qildi. Bu haqda Oq uy matbuot xizmati ma’lum qildi, deya xabar beradi “TASS”.

“Vitse-prezident Iroq kuchlari IShIDga qarshi kurash borasida erishayotgan muvaffaqiyatlarni olqishladi. Prezident Barzoniyga kurd tuzilmalari bunga qo‘shayotgan hissa uchun minnatdorchilik bildirdi. Bosh vazir Haydar al-Obodiy va Iroq hukumati bilan tig‘iz hamkorlik muhimligiga e’tibor qaratdi”, — deya ta’kidladi Oq uy ma’muriyati vakillari.

Suhbatdoshlar mamlakat suvereniteti va hududiy yaxlitligini qo‘llab-quvvatlab, Iroqdagi barcha harbiy operatsiyalar rasmiylar bilan kelishgan holda amalga oshirilishi zarurligini bildirdi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.