29-noyabr kuni Moskvada O‘zbekiston va Rossiya harbiy-texnik hamkorlikni rivojlantirish to‘g‘risida shartnoma hamda 2017-yil uchun harbiy idoralar o‘rtasida ikki tomonlama hamkorlik rejasini imzoladi. Hujjatni O‘zbekiston mudofaa vaziri Qobul Berdiyev va uning rossiyalik hamkasbi Sergey Shoygu imzoladi, deb xabar beradi UzDaily.
Muzokaralar davomida Sergey Shoygu Rossiya va O‘zbekiston harbiy va harbiy-texnik hamkorlikni ikki davlat xavfsizligi yo‘lida kengaytirishda katta istiqbolga egaligiga ishonch bildirdi.
Qobul Berdiyev, o‘z navbatida, Rossiya O‘zbekistonning bosh strategik hamkori ekanligini ta’kidlab o‘tdi. U ikki mamlakatni ko‘plab rishtalar bog‘lashini aytdi.
“Balki ayrim bosqichlarda o‘zaro hamkorligimiz u darajada faol bo‘lmagandir, ammo biz har doim Rossiya bilanmiz, biz u bilan aloqalarni hech qachon uzmaganmiz”, — dedi O‘zbekiston harbiy idorasi rahbari.
U, shuningdek, o‘zbekistonlik ofitser va kursantlarning Rossiya harbiy o‘quv muassasalarida ta’lim olish jarayoni 2012-yildagi uzilishdan so‘ng qayta boshlangani uchun minnatdorlik bildirdi.
Rossiya bilan harbiy hamkorlik mavzusiga qaytar ekan, Qobul Berdiyev uning mustahkamlanib borayotganini, tadbirlar soni yil sayin ortib borayotganini hamda O‘zbekiston tomoni bundan mamnun ekanini alohida qayd etdi.
“2017-yilda ularning soni, rejaga muvofiq, ikki barobar ko‘p bo‘ladi, tadbirlar soni 36 taga yetadi, bu esa juda ahamiyatli raqamdir”, — dedi Qobul Berdiyev.
Muzokaralar yakunlariga ko‘ra Sergey Shoygu va Qobul Berdiyev harbiy-texnik hamkorlikni rivojlantirish to‘g‘risida shartnoma hamda 2017-yil uchun harbiy idoralar o‘rtasida ikki tomonlama hamkorlik rejasini imzoladi.
“Bugun ushbu hujjatning imzolanishi O‘zbekiston Qurolli kuchlari texnik ta’minoti va uning jangovar shayligini oshirish masalalarini tezkor hal qilish imkonini beradi. Mudofaa idoralarimiz hamkorligini jonlantirish va ularni amaliy yo‘naltirishga katta e’tibor qaratamiz”, — qayd etdi Shoygu.
“Bugun Markaziy Osiyo mintaqasidagi tahdidlar ularni bartaraf etish uchun kuchlarni birlashtirishni talab etiladi. Mamlakatlarimizga IShID jangarilarining kelishiga yo‘l qo‘ymasligimiz muhim”, — qo‘shimcha qildi Rossiya mudofaa vaziri.
Shuningdek, u 2020-yilga qadar O‘zbekiston qurolli kuchlarini modernizatsiya qilish hamda Rossiyaning zamonaviy qurollari va harbiy texnikasi bilan qayta jihozlash dasturi amalga oshirilishini ma’lum qildi.
Izoh (0)