Joriy yil 28-noyabr kuni Davlat raqobat qo‘mitasida Yaponiya xalqaro hamkorlik agentligi (JICA)ning O‘zbekistondagi vakolatxonasi rahbari janob Katsutoshi Fushimi bilan uchrashuv bo‘lib o‘tdi. Bu haqda qo‘mita matbuot xizmati xabar berdi.
Uchrashuvda tomonlar O‘zbekistonda korporativ boshqaruv tizimi va fond bozorini rivojlantirish sohalari bo‘yicha istiqboldagi hamkorlik aloqalarini yanada kengaytirish masalalarini muhokama qildi.
Shu jumladan, yaponiyalik tajribali mutaxassis va professor o‘qituvchilar ishtirokida o‘quv kurslarini tashkil etish va kurslarni muvaffaqiyatli tamomlagan tinglovchilarni Yaponiyaning yetakchi kompaniyalariga amaliyot o‘tashga yuborish imkoniyatlari ko‘rib chiqildi.
Ushrashuv qatnashchilari O‘zbekistonda aksiyadorlik jamiyatlarida Korporativ boshqaruv kodeksining joriy etilishi bilan bog‘liq yutuqlarni e‘tirof etib, korporativ boshqaruv tizimini yanada takomillashtirish bo‘yicha galdagi vazifalar, ya’ni aksiyadorlik jamiyatlari Kuzatuv kengashlarining mustaqil a’zolari rolini oshirish bo‘yicha o‘zaro tajriba almashish masalasini muhokama qildi.
Shuningdek, O‘zbekistonda fond bozorini yanada rivojlantish va fond bozorida investitsiya fondlari rolini oshirish istiqbolda tomonlar o‘rtasida hamkorlikning muhim yo‘nalishlaridan bo‘lishi mumkinligini ta’kidlab o‘tdilar.
Izoh (0)