Osiyo taraqqiyot banki 28-noyabr kuni O‘zbekistonning meva-sabzavot sohasidagi ishlab chiqarish-sotish zanjiri taraqqiyotini yaxshilash uchun 154 million dollar miqdorida qarz berilishini ma’qulladi, deb yozadi UzDaily.
OTBning Markaziy va G‘arbiy Osiyo mintaqaviy departamentining tabiiy resurslar va qishloq xo‘jaligi bo‘yicha katta iqtisodchisi Bui Minx Jiap aytishicha, ushbu mablag‘ meva-sabzavot yetishtirish bilan shug‘ullanadigan fermerlarni hamda meva-sabzavot sohasidagi ishlab chiqarish-sotish zanjiriga jalb etilgan korxonalarni uzoq muddatli moliyalashtirish imkoniyatini kengaytirishda yordam beradi.
O‘zbekiston hukumati OTBning qarzini ishtirokchi moliyaviy institutlarga qaytadan moliyalashtirish uchun beradi. Ular orasida “Asaka” banki, Davr bank, Hamkorbank, “Ipak yo‘li” banki, Ipoteka bank, O‘zbekiston Respublikasi Milliy banki, Turonbank va O‘zsanoatqurilish banki bor.
O‘z navbatida, banklar manfaatdor hamda kredit olish talablariga javob beradigan fermerlar va korxonalarga meva-sabzavot sohasidagi faoliyatni moliyalashtirish uchun subkreditlar taqdim etadi.
Izoh (0)