29 ноябрь куни Москвада Ўзбекистон ва Россия ҳарбий-техник ҳамкорликни ривожлантириш тўғрисида шартнома ҳамда 2017 йил учун ҳарбий идоралар ўртасида икки томонлама ҳамкорлик режасини имзолади. Ҳужжатни Ўзбекистон мудофаа вазири Қобул Бердиев ва унинг россиялик ҳамкасби Сергей Шойгу имзолади, деб хабар беради UzDaily.
Музокаралар давомида Сергей Шойгу Россия ва Ўзбекистон ҳарбий ва ҳарбий-техник ҳамкорликни икки давлат хавфсизлиги йўлида кенгайтиришда катта истиқболга эгалигига ишонч билдирди.
Қобул Бердиев, ўз навбатида, Россия Ўзбекистоннинг бош стратегик ҳамкори эканлигини таъкидлаб ўтди. У икки мамлакатни кўплаб ришталар боғлашини айтди.
«Балки айрим босқичларда ўзаро ҳамкорлигимиз у даражада фаол бўлмагандир, аммо биз ҳар доим Россия биланмиз, биз у билан алоқаларни ҳеч қачон узмаганмиз», — деди Ўзбекистон ҳарбий идораси раҳбари.
У, шунингдек, ўзбекистонлик офицер ва курсантларнинг Россия ҳарбий ўқув муассасаларида таълим олиш жараёни 2012 йилдаги узилишдан сўнг қайта бошлангани учун миннатдорлик билдирди.
Россия билан ҳарбий ҳамкорлик мавзусига қайтар экан, Қобул Бердиев унинг мустаҳкамланиб бораётганини, тадбирлар сони йил сайин ортиб бораётганини ҳамда Ўзбекистон томони бундан мамнун эканини алоҳида қайд этди.
«2017 йилда уларнинг сони, режага мувофиқ, икки баробар кўп бўлади, тадбирлар сони 36 тага етади, бу эса жуда аҳамиятли рақамдир», — деди Қобул Бердиев.
Музокаралар якунларига кўра Сергей Шойгу ва Қобул Бердиев ҳарбий-техник ҳамкорликни ривожлантириш тўғрисида шартнома ҳамда 2017 йил учун ҳарбий идоралар ўртасида икки томонлама ҳамкорлик режасини имзолади.
«Бугун ушбу ҳужжатнинг имзоланиши Ўзбекистон Қуролли кучлари техник таъминоти ва унинг жанговар шайлигини ошириш масалаларини тезкор ҳал қилиш имконини беради. Мудофаа идораларимиз ҳамкорлигини жонлантириш ва уларни амалий йўналтиришга катта эътибор қаратамиз», — қайд этди Шойгу.
«Бугун Марказий Осиё минтақасидаги таҳдидлар уларни бартараф этиш учун кучларни бирлаштиришни талаб этилади. Мамлакатларимизга ИШИД жангариларининг келишига йўл қўймаслигимиз муҳим», — қўшимча қилди Россия мудофаа вазири.
Шунингдек, у 2020 йилга қадар Ўзбекистон қуролли кучларини модернизация қилиш ҳамда Россиянинг замонавий қуроллари ва ҳарбий техникаси билан қайта жиҳозлаш дастури амалга оширилишини маълум қилди.
Изоҳ (0)