Ruminiya aksilkorrupsiyaviy prokuraturasi Microsoft kompaniyasining ikki sobiq menejeri va Fujitsu Siemens Computers sobiq menejeriga xizmat vakolatini suiiste’mol qilish va noqonuniy daromad olish, buning ortidan davlatga 67 million dollar zarar keltirishda ayblov e’lon qildi. Bu haqda “TASS” xabar bermoqda.
AP manbalariga ko‘ra, menejerlar hukumat bilan 2004—2008-yillarda Microsoft litsenziyalarini xarid qilish uchun shartnomalar tuzgan. Biroq, hukumat shartnomada ko‘rsatilganidan ko‘proq mablag‘ to‘lab bergan.
Prokuratura uch ayblanuvchini ham sud nazoratiga oldi: ular politsiyaga harakatlari to‘g‘risida xabar berishi lozim, Ruminiya hududini esa tark etolmaydi.
Oldinroq mamlakatdagi korrupsiyaga oid yirik mojarolardan biri bo‘lgan Microsoft ishi bo‘yicha Ruminiya oliy kassatsiya sudi Pyatra-Nyams shahri sobiq meri George Shtefan 6 yil, sobiq aloqa va axborot jamiyati vaziri Gabriyel Sandu 3 yil, tadbirkorlar Dorin Kokosh va Nikolaye Dumitru esa 2 yilu 4 oy qamoq jazosiga hukm qilingandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)