O‘zbekiston Respublikasi Prezidenti sayloviga tayyorgarlikning borishi, shuningdek, mamlakat saylov tizimidagi o‘ziga xosliklar Xitoy OAVlarida ham o‘z aksini topmoqda. Bu haqda “Jahon” axborot agentligi xabar bermoqda.
Masalan, The Paper (Pengpai News) Shanxay xalqaro press-byurosi tarqatgan maqolada davlatning oliy lavozimiga har bir nomzod saylovoldi dasturida respublika ijtimoiy-iqtisodiy rivojlanishi ko‘zda tutilgani qayd etilgan.
Muallif — xalqaro press-byuro bosh muharriri va direktori Vu Ting mazkur maqolada saylovni shaffoflik, adolat va ochiqlik tamoyillari asosida o‘tkazish bo‘yicha O‘zbekiston Respublikasi Markaziy saylov komissiyasi tomonidan ko‘rilayotgan chora-tadbirlar haqida ham atroflicha to‘xtalgan.
“Saylovoldi kampaniyasiga doir materiallar ommaviy axborot vositalarida turli tillarda yoritilmoqda, saylov bilan bog‘liq faoliyat qat’iyan milliy qonunchilikka muvofiq holda amalga oshirilmoqda”, deb yozadi u.
Xitoyning “Dunfan Szabao” (“Sharq tongi”) gazetasida bosilib chiqqan maqolada jurnalist Vey Sin milliy qonunchilik xalqaro me’yor va tamoyillarga muvofiq ravishda fuqarolarning xohish-irodalarini erkin ifoda etishlarini ta’minlashi qayd qilingan. Muallif mamlakatda saylov jarayonida ochiqlik va oshkoralikni ta’minlashning mexanizmlari yaratilganini alohida qayd etadi.
Maqolada saylovga oid qonunchilikni buzganlik uchun jinoiy javobgarlikni belgilovchi me’yorlar xalqaro huquqning umume’tirof etilgan tamoyillariga asoslangan va rivojlangan demokratik davlatlarning qonunchilik amaliyoti hamda tajribasiga mos kelishi alohida ta’kidlangan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)