Rossiyaning Sankt-Peterburg shahridagi “Sibur Arena” majmuasida AIBA Youth World Boxing Championships — boks bo‘yicha yoshlar o‘rtasidagi jahon chempionati boshlandi. Bu haqda “Olamsport” xabar bermoqda.
17–18 yoshli bokschilar o‘rtasida o‘tayotgan jahon chempionatida dunyoning 75 davlatidan 402 nafar charm qo‘lqop ustasi 10 ta vazn toifasida ishtirok etmoqda. O‘zbekiston terma jamoasi a’zolari barcha vazn toifalarida qatnashmoqda.
Musobaqaning ilk kuni ringga ko‘tarilgan 5 nafar o‘zbekistonlik bokschining barchasi raqiblarini katta ustunlik bilan mag‘lubiyatga uchratdi.
-52 kilogramm vaznda qatnashayotgan Otabek Xolmatov ilk jangida qirg‘izistonlik Fatxiddin Hamroyevdan 4:1 hisobida ustun keldi.
-64 kilogramm vazn toifasida Behruz Rahmonov birinchi bellashuvida ozarbayjonlik Baxtiyor Gazibayevga hech qanday imkoniyat qoldirmadi — 5:0.
Yana bir o‘zbekistonlik bokschi, -69 kilogramm vazndagi Ulug‘bek Sobirov ham xuddi shu hisobda yaponiyalik raqibi Zen Kuroyanagini mag‘lubiyatga uchratdi.
-75 kilogramm vazn toifasida o‘z imkoniyatini sinovdan o‘tkazayotgan Shohruzbek Rustamov ham jahon chempionatidagi ishtirokini g‘alaba bilan boshladi. U belaruslik Yagor Skamaroxni 5:0 hisobida yengdi.
-81 kilogramm vazndagi Sanjar Tursunov esa litvalik Vilandas Valchiukasni 5:0 hisobida mag‘lub etdi.
Izoh (0)