Las-Vegasda (AQSh, Nevada shtati) 19-noyabr, shanba kuni yirik boks kechasi bo‘lib o‘tadi. Uning doirasida yarim og‘ir vaznda WBA (Super), WBO va IBF versiyalari bo‘yicha jahon chempioni, 33 yoshli rossiyalik Sergey Kovalyov Super Six turniri g‘olibi va ikkinchi o‘rta vazn sobiq yetakchisi 32 yoshli amerikalik Andre Uord bilan jang qiladi. Bu haqda “Gazeta.uz” xabar bermoqda.
Ushbu markaziy bellashuvdan tashqari, kecha tashkilotchilari yana to‘qqiz bellashuvga tayyorgarlik ko‘rmoqda. Jumladan, o‘zbekistonlik 24 yoshli Botirsher Obidov 23 yoshli rossiyalik Bahrom Murtazaliyevga qarshi sakkiz raundlik jangga chiqadi.
Andijonlik bokschi professional boksdagi faoliyatini o‘tgan yil fevralida boshlagan. Bu vaqt davomida u AQShda yetti uchrashuv o‘tkazib, ularning oltitasida g‘alaba (ikkita nokaut) va bir durangga erishdi.
Turnir T-Mobile Arena’da o‘tkaziladi, translyatsiya esa Pay-Per-View tizimi bo‘yicha HBO telekanali orqali amalga oshiriladi. Shou Rossiyaning Birinchi kanali orqali 20-noyabr, yakshanba kuni Toshkent vaqti bilan 9:50 da to‘g‘ridan-to‘g‘ri efirda olib beriladi.
Izoh (0)