Eron politsiyasi AQSh avtomobillari, shuningdek, mazkur mamlakatda ishlab chiqarilgan nemis va yapon mashinalariga ro‘yxatdan o‘tkazish belgilari berishni to‘xtatdi. Bu haqda Motor xabar bermoqda.
“AQSh hududida ishlab chiqarilgan barcha transport vositalari, jumladan, Honda va Toyota avtomobillari uchun raqamli belgilar berilishi man etildi. Bu qaror iyulda qabul qilingandi. Endi hatto mamlakatga bojxona orqali qonuniy ravishda keltirilgan mashinalar ham ro‘yxatdan o‘tolmaydi”, — deya Yaponiyaning The Japan Times nashriga ma’lum qildi Eron politsiyasi vakili.
Eron avtomobil importchilari ijrochi direktori Farhod Ehtishomzodaga ko‘ra, politsiya taqiqi yuridik asosga ega emas va oyatulloh Ali Xomanaiy ko‘rsatmalarigagina tayangan. Oxirgi bir necha oyning o‘zida mamlakat fuqarolari AQShda ishlab chiqarilgan 500 ga yaqin yapon va nemis avtomobillarini buyurtma qildi. Ularning umumiy qiymati 12 million dollarga boradi.
Ma’lumot uchun, Eronda raqamli belgilarsiz transportni boshqarish jinoyat hisoblanadi va bir yilgacha muddatga qamoq bilan jazolanadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)