Myanmada osmondan noma’lum obyekt qulab tushdi

Myanma shimolida nefrit qazib olinadigan ochiq konga osmondan katta metall obyekt tushdi, deb yozadi “Korrespondent.net” davlat OAVlariga tayanib. Uzunligi 4,5 metr va kengligi 1,2 metr bo‘lgan silindr shaklidagi obyekt 10-noyabr, payshanba kuni Kachin shtatida aniqlangan.

Deyarli shu vaqtning o‘zida Xitoy tilida yozuvi bo‘lgan yana bir metall bo‘lagi qo‘shni uyning tomini teshib kirdi, qurbonlar va jabrlanganlar yo‘q.

Taxminlarga ko‘ra, bo‘laklar Xitoyning “Pulsar” tajribaviy sun’iy yo‘ldoshi uchirilishi bilan bog‘liq bo‘lishi mumkin, uni “Chanchjen-11” eltuvchi raketasi orbitaga payshanbaga o‘tar kechasi olib chiqqan edi.

Amaldorlar so‘zlariga ko‘ra, osmondan uchib tushgan obyekt yerga urilgach, 50 metrga sakrab ketgan, so‘ng ochiq konga tushgan.

“Topilgan metall obyektlar sun’iy yo‘ldosh bo‘laklari yoki bo‘lmasa, samolyot yoki raketa dvigateli detallari bo‘lishi mumkin”, — deb yozadi Global New Light.

Kachin shtati hukumati obyektning nimaligi hozircha aniqlanmaganini aytdi.