Berkshire Hathaway kompaniyasi asoschisi, investor Uorren Baffet amerikaliklar Donald Trampni AQShning yangi prezidenti etib saylagach, dunyoning eng badavlat kishilari ro‘yxatida ikkinchi o‘ringa qaytishga muvaffaq bo‘ldi, deb yozadi “Vedomosti” Bloomberg’ga tayanib.
Dunyo bozorlaridagi tebranishlar, asosan esa Wells Fargo banki aksiyalari ko‘tarilib ketishi natijasida, Baffetning boyligi bir hafta ichida 5,8 milliard dollarga o‘sib, 70,2 milliard dollarni tashkil qildi. Ta’kidlanishicha, o‘tgan saylovlarda investor Trampning raqobatchisi, Hillari Klintonni faollik bilan qo‘llab-quvvatlagan.
Sayyoraning eng badavlat kishisi, Microsoft asoschisi Bill Geyts esa 87,1 milliard dollar ko‘rsatkich bilan reytingning birinchi pog‘onasini o‘zida saqlab qoldi.
Ispaniyaning Inditex riteyleri rahbari Amansio Ortega 2,5 milliard dollar yo‘qotib, ikkinchi o‘rindan uchinchi o‘ringa tushib qoldi (69,9 milliard dollar), Amazon direktori Jeff Bezos esa 3,9 milliard dollarga kambag‘allashib, to‘rtinchi o‘rinda joylashdi (64,6 milliard dollar).
Izoh (0)