O‘zbekiston Intellektual mulk agentligining faoliyati isloh etiladi. Bu O‘zbekiston Prezidenti vazifasini bajaruvchi Shavkat Mirziyoyevning 20-oktabridagi qarorida ko‘zda tutilgan, deb xabar beradi “Gazeta.uz”.
Ta’kidlanishicha, asosiy urg‘u intellektual mulk obyektlarini xalqaro me’yor va standartlarga muvofiq huquqiy himoya qilish tizimini takomillashtirish, eskirgan funksiyalarni tugatish, shuningdek, zamonaviy interaktiv davlat xizmatlarini joriy etishga qaratiladi.
Jumladan, jamoaviy asosda mulk huquqini boshqaruvchi tashkilotlarni davlat ro‘yxatidan o‘tkazish funksiyasi Adliya vazirligining vakolatlarini qayta takrorlovchi funksiya sifatida tugatiladi. Bundan tashqari, O‘zbekiston hududida intellektual mulk obyektlaridan foydalanuvchi yuridik va jismoniy shaxslarni ro‘yxatga olish tizimidan voz kechish rejalashtirilmoqda, negaki bu litsenzion kelishuvlarni ro‘yxatga olish mexanizmini takrorlaydi.
Qaror bilan, shuningdek, agentlikning asosiy vazifa va faoliyat yo‘nalishlari qayta ko‘rib chiqilib, agentlik ijroiya devoni strukturasiga o‘zgarishlar kiritilmoqda. Devon xodimlari soni 70 kishidan 78 kishiga ko‘paytirildi, bosh direktorning ikkinchi o‘rinbosari lavozimi ta’sis etildi.
Bundan tashqari, agentlikka 2017-yilga qadar patentlar uchun elektron ariza topshirishni nazarda tutuvchi axborot tizimini joriy etish, patent fondining ochiq bazasini shakllantirish, “yagona oyna” prinsipi asosida davlat interaktiv xizmatlarini joriy qilish topshirildi.
Izoh (0)