Ўзбекистон Интеллектуал мулк агентлигининг фаолияти ислоҳ этилади. Бу Ўзбекистон Президенти вазифасини бажарувчи Шавкат Мирзиёевнинг 20 октябридаги қарорида кўзда тутилган, деб хабар беради «Газета.uz».
Таъкидланишича, асосий урғу интеллектуал мулк объектларини халқаро меъёр ва стандартларга мувофиқ ҳуқуқий ҳимоя қилиш тизимини такомиллаштириш, эскирган функцияларни тугатиш, шунингдек, замонавий интерактив давлат хизматларини жорий этишга қаратилади.
Жумладан, жамоавий асосда мулк ҳуқуқини бошқарувчи ташкилотларни давлат рўйхатидан ўтказиш функцияси Адлия вазирлигининг ваколатларини қайта такрорловчи функция сифатида тугатилади. Бундан ташқари, Ўзбекистон ҳудудида интеллектуал мулк объектларидан фойдаланувчи юридик ва жисмоний шахсларни рўйхатга олиш тизимидан воз кечиш режалаштирилмоқда, негаки бу лицензион келишувларни рўйхатга олиш механизмини такрорлайди.
Қарор билан, шунингдек, агентликнинг асосий вазифа ва фаолият йўналишлари қайта кўриб чиқилиб, агентлик ижроия девони структурасига ўзгаришлар киритилмоқда. Девон ходимлари сони 70 кишидан 78 кишига кўпайтирилди, бош директорнинг иккинчи ўринбосари лавозими таъсис этилди.
Бундан ташқари, агентликка 2017 йилга қадар патентлар учун электрон ариза топширишни назарда тутувчи ахборот тизимини жорий этиш, патент фондининг очиқ базасини шакллантириш, «ягона ойна» принципи асосида давлат интерактив хизматларини жорий қилиш топширилди.
Изоҳ (0)