Venesuela prezidenti Nikolas Maduro mamlakatda davlat to‘ntarishi va davlat ishlariga chet eldan aralashuv bo‘lishiga yo‘l qo‘ymaslikka va’da berdi. Bu haqda “RIA Novosti” agentligi xabar bermoqda.
“Davlat to‘ntarishi ham, Amerikaning aralashuvi ham bo‘lmaydi. Venesuelada tinchlik hukmronlik qiladi. Nafrat va befarqlikni, to‘ntarish va fitnalarni to‘xtatish vaqti keldi!”, — dedi Maduro poytaxt Karakasdagi tadbir chog‘ida.
Venesuela prezidenti mazkur bayonotni butun mamlakat bo‘ylab hukumatga qarshi norozilik namoyishlari faol davom etayotgan bir vaqtda berdi.
Aholi Nikolas Maduroning vakolatlarini to‘xtatish masalasi bo‘yicha referendum o‘tkazish uchun imzo yig‘ish jarayoni sud qaroriga ko‘ra to‘xtatib qo‘yilgani sabab, norozilik namoyishlari o‘tkazmoqda.
Muxolifat vakillari ko‘pchilikni tashkil etayotgan parlamentning fikricha, Maduro konstitutsiyani buzgan. Shu sababli ham, Venesuela asosiy qonunida bunday tartib ko‘zda tutilmagan bo‘lsa-da, Maduroni lavozimidan chetlatish masalasini kun tartibiga qo‘ygan edi.
Nikolas Maduro Venesueladagi ziddiyatga borayotgan tomonlarni o‘zaro muloqotga chaqirgan, biroq muxolifat bu taklifni rad etmoqda. “Muloqot va tinchlikning muqobili yo‘q. Biz muloqot o‘rnatishni xohlaymiz, chunki niyatimiz — tinchlik”, — dedi Maduro.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)