Венесуэла президенти Николас Мадуро мамлакатда давлат тўнтариши ва давлат ишларига чет элдан аралашув бўлишига йўл қўймасликка ваъда берди. Бу ҳақда «РИА Новости» агентлиги хабар бермоқда.
«Давлат тўнтариши ҳам, Американинг аралашуви ҳам бўлмайди. Венесуэлада тинчлик ҳукмронлик қилади. Нафрат ва бефарқликни, тўнтариш ва фитналарни тўхтатиш вақти келди!», — деди Мадуро пойтахт Каракасдаги тадбир чоғида.
Венесуэла президенти мазкур баёнотни бутун мамлакат бўйлаб ҳукуматга қарши норозилик намойишлари фаол давом этаётган бир вақтда берди.
Аҳоли Николас Мадуронинг ваколатларини тўхтатиш масаласи бўйича референдум ўтказиш учун имзо йиғиш жараёни суд қарорига кўра тўхтатиб қўйилгани сабаб, норозилик намойишлари ўтказмоқда.
Мухолифат вакиллари кўпчиликни ташкил этаётган парламентнинг фикрича, Мадуро конституцияни бузган. Шу сабабли ҳам, Венесуэла асосий қонунида бундай тартиб кўзда тутилмаган бўлса-да, Мадурони лавозимидан четлатиш масаласини кун тартибига қўйган эди.
Николас Мадуро Венесуэладаги зиддиятга бораётган томонларни ўзаро мулоқотга чақирган, бироқ мухолифат бу таклифни рад этмоқда. «Мулоқот ва тинчликнинг муқобили йўқ. Биз мулоқот ўрнатишни хоҳлаймиз, чунки ниятимиз — тинчлик», — деди Мадуро.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)