National Geographic muqovasidagi “Afg‘on qizi” suratining muallifi Pokiston hukumati harakatlarini qoraladi

1985-yili National Geographic jurnali muqovasida e’lon qilingan “Afg‘on qizi” (Sharbat Gula) suratining muallifi, amerikalik fotosuratchi Stiv Makkari Pokistonda Sharbat Gulaning hibsga olinganini inson huquqlarining qo‘pol ravishda buzilishi deb baholadi. Bu haqda “Interfaks” xabar bermoqda.

“Men ma’muriyat vakillarining bunday harakatlariga qarshiman. U butun hayoti davomida aziyat chekkan va uning hibsga olinishi — inson huquqlarining qo‘pol ravishda buzilishidir”, — deb yozdi Makkari Instagram’dagi sahifasida qoldirgan xabarda.

Makkarining aytishicha, u Gulaning hibsga olinganini Pokistonning Peshovar shahrida istiqomat qiluvchi do‘stidan bilgan.

“Men u va uning oilasini yuridik va moddiy jihatdan qo‘llab-quvvatlash uchun qo‘limdan kelganini qilishga tayyorman”, — deydi fotosuratchi.

Avvalroq Sharbat Gula qalbaki hujjatlar sabab Pokistonda hibsga olingani, u 14 yilgacha ozodlikdan mahrum etilishi mumkinligi haqida xabarlar paydo bo‘lgan edi.

Gula 1985-yili, uning surati National Geographic jurnali muqovasida bosilib chiqqanidan so‘ng mashhur bo‘lib ketgan. O‘sha vaqtda u Afg‘onistondagi qochoqlar lagerida yashar edi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.