Prezident saylovini yoritish bo‘yicha Respublika matbuot markazida O‘zbekiston Respublikasi Prezidenti saylovini o‘tkazuvchi uchastka saylov komissiyalari faoliyatini samarali tashkil etishga bag‘ishlangan respublika onlayn seminar-treningi o‘tkazildi. Videokonferensaloqa tarzida o‘tkazilgan tadbirni Markaziy saylov komissiyasi raisi M. Abdusalomov olib bordi.
Saylovlarga tayyorgarlik ko‘rish va o‘tkazishda uchastka saylov komissiyalarining o‘rni katta. Qonunchilikka ko‘ra, uchastka saylov komissiyasi okrug saylov komissiyasi tomonidan saylovga kamida 40 kun qolganida 5—19 nafar a’zo, jumladan, rais, rais o‘rinbsari va kotibdan iborat tarkibda tuziladi.
Seminarda saylov uchastkalarini jihozlash, “Ona va bola” hamda tibbiyot xonalarini tashkil etish, komissiyaning samarali ish faoliyati uchun zarur shart-sharoitlar yaratish kabi masalalar muhokama etildi. Uchastka saylov komissiyalari faoliyatini moliyalashtirish, saylovchilar ro‘yxatini tuzishning o‘ziga xos xususiyatlari, muddatidan oldin ovoz berishni tashkil qilish kabi mavzularda ma’ruzalar tinglandi. Xalqaro va mahalliy kuzatuvchilar, OAV vakillari bilan ishlash yuzasidan fikr yuritildi.
Ta’kidlash joizki, mazkur tadbir uchastka saylov komissiyalari faoliyatini samarali tashkil etishga qaratilgan uch bosqichli seminar-treninglarning dastlabkisi hisoblanadi. Shunga o‘xshash tadbirlar viloyatlar va tumanlarda Markaziy saylov komissiyasi a’zolari hamda ekspertlari ishtirokida tashkil etiladi.
Tadbir ishtirokchilari uchun Markaziy saylov komissiyasi va O‘zbekiston Milliy teleradiokompaniyasi hamkorligida tayyorlangan uchastka saylov komissiyalari haqidagi o‘quv filmi namoyish etildi.
Izoh (0)