Rossiya Aralash janglar san’ati (MMA) ittifoqi prezidenti, sobiq MMA kurashchisi Fyodor Yemelyanenkoning voyaga yetmagan qiziga hujum qilinishi bo‘yicha jinoiy ish qo‘zg‘atildi. Bu haqda “Interfaks”ga tayanib, “RBK” xabar bermoqda.
“Interfaks”ning huquq-tartibot organlaridagi suhbatdoshining ma’lum qilishicha, 16 yoshli qizga jiddiy jarohat yetkazilganidan so‘ng jinoiy ish ochildi. Shuningdek, agentlikning manbasi jarohat olgan qiz Fyodor Yemelyanenkoning farzandi ekanini tasdiqladi. 16 yoshli qizga qilingan hujum uning otasining sport faoliyatiga bog‘liq ekani tasdiqlanmadi.
“RIA Novosti”ning manbasi Yemelyanenkoning qizi hamon shifoxonada ekanini ma’lum qildi. Yaqin kunlarda jinoiy ish Tergov qo‘mitasiga topshirilishi xabar qilinmoqda.
Avvalroq Moskvada Yemelyanenkoning 9 yoshli qiziga hujum qilingani va buning oqibatida u shifoxonaga tushib qolgani haqida xabar qilingandi. Ammo keyinchalik Fyodorning 16 yoshli qiziga hujum qilingani ma’lum bo‘ldi.
Ma’lumot uchun, Fyodor Yemelyanenkoning birinchi turmushidan 1999-yili Mariya ismli qiz tug‘ilgan. Uning ikkinchi turmushidan 2007-yili Vasilisa, 2011-yilda esa Yelizaveta ismli qizlar dunyoga kelgan.
Eslatib o‘tamiz, Fyodor Yemelyanenko 4-oktabr kuni Grozniy shahrida o‘tkazilgan Grand Prix Akhmat 2016 aralash janglar turnirida yosh bolalar ishtirokini tanqid qilgandi. Keyinroq “Axmat” klubi prezidenti Abuzayd Vismuradov Rossiya MMA rahbarining ushbu masala yuzasidan tanqid qilishga haqqi yo‘q ekanini aytgandi.
Shuningdek, Checheniston rahbari Ramzan Qodirov Yemelyanenkoning tanqidiga o‘z munosabatini bildirgan edi.
Izoh (0)